El Premiu Camaretá al Meyor Cantar, promovíu pola Conseyería de Cultura, Política Llingüística y Deporte, yá tien finalistes pa la so edición del 2025: Ferla Megía, Héctor Braga, Herbamora y Lïbre. El sábadu 18 d’ochobre Xixón va volver acoyer la final del certame nel Teatru de la Llaboral. Nesa gala, el mesmu xuráu va decidir cuála va ser la canción vencedora y La Bonturné, formación premiada na edición anterior col tema ‘Odisea la nui‘, va ufiertar una actuación.
El Premiu Camaretá al Meyor Cantar ta dotáu con 6.000 euros, la realización d’un videoclip y actuaciones dientro del circuitu Autores nel Camín. Convócalu’l Gobiernu del d’Asturies cola mira de afianzar, prestixar y arriquecer la creación musical tanto n’asturianu como en gallego-asturianu.
Ferla Megía, con ‘Xatu‘. Esti artista creador d’atmósferes ye una de les voces más inquietes de la escena asturiana y bebe tanto de los soníos urbanos como de la música más tradicional. El cantar finalista forma parte del so últimu EP, Páxaros 01.
Héctor Braga, con «Valiente«. Ye un referente afianzáu de la música asturiana, con siete discos publicaos hasta’l momentu y abondos reconocimientos tanto poles sos creaciones musicales y ensayístiques como poles so interpretaciones. Esti cantar forma parte del so trabayu últimu, Rabil.
Herbamora, con ‘Eclipse total‘. Cinco pandereteres y cantantes componen esta formación nacida nel 2003 cola intención de dar un aire nuevo a la tradición de la pandereta. Ganadores d’esti premiu nel 2007, la canción finalista pertenez al so tercer trabayu discográficu, 286 Llunes.
Lïbre, con ‘L’ablugada‘. Formación creada de recién con miembros d’otres bandes (Mala Reputación, Misiva, Origen y Desakato), nel so primer EP, Ciudadano Lunar, esploren soníos variaos, dende la canción d’autor hasta el pop alternativu, ensin escaecer la so base rock.
Suscríbite a les nuestres novedaes
