La Sala Gong d’Uviéu volvió ser testigu d’una d’eses nueches que marquen, que dexen memoria y que confirmen que’l punk asturianu sigue vivu y con fuercia. El sábadu 15 de payares, Ochobre presentaba oficialmente na capital el so nuevu trabayu La rabia nos dientes, un discu que ye muncho más que un conxuntu de canciones: ye una declaración de principios, un gritu colectivu escontra la precariedá, la represión y les desigualdaes.
El grupo de punk-folk non namás presentaba’l so segundu llarga duración, que sacaron en xunetu d’esti añu y col que yá lleven varios conciertos, sinón qu’aprovechaben esti conciertu tan especial pa presentar un nuevu directu con aires renovaos y que va permiti-yos siguir presentando los sos cantares en dellos conciertos que yá tienen anunciaos pa esti añu y entamos del que vien.
La nueche entamó con Entretiempo, banda llegada dende Madrid, de xira presentando el so discu Motor y al aire, que convirtió l’escenariu nuna pista d’aterrizaxe aportando frescura y ritmu con un punk rock mestizáu con aires ska. El so soníu, cargáu de mensaxe y vitalidá, con temes nuevos como ‘Hemos vuelto a ver el sol’ o del so anterior discu como ‘¡Vamos a ladrar!’ sirvieron pa calecer l’ambiente a bona parte del publicu presente y prepara-yos pa la descarga d’Ochobre.
«Xuntaron a un centenar de persones namás pa velos a ellos. Asina demostraron que son un grupu afitáu y consolidáu na escena, creando un ambiente de comunidá que mui pocos grupos pueden llograr»
Puntuales salíen al escenariu Ochobre, cola ilusión de presentar el so discu nun conciertu tan especial y tan bien preparáu nel que xuntaron a un centenar de persones n’Uviéu namás pa velos a ellos (y eso que coincidía con Biznaga, banda de moda del punk madrileñu, que tocaron nos Kuivi Almacenes con toles entraes vendíes). Asina demostraron que son un grupu afitáu y consolidáu na escena con una base de fans que tamién son conocíos y collacios, creando un ambiente de comunidá que mui pocos grupos pueden llograr.
El directu d’Ochobre amosó a una banda madura, con un soníu más contundente y variáu, pero ensin perder la esencia punk cola qu’entamaron na escena asturiana. La rabia y la emoción tresmitíense dende’l primer acorde, con un setlist que combinó clásicos y temes nuevos del discu recién estrenáu.
«Entamaron faciendo un repás a varios de los temes del so primer discu, Sobredosis de grisú, que siguen evolucionando y tando mui vivos nel directu, adaptándose perbién a los cambeos de formación y la voz de la so actual cantante»
Entamaron faciendo un repás a varios de los temes del so primer discu, Sobredosis de grisú, como ‘Eau d’Asturies’, ‘Borbón y cuenta nueva’ y ‘Oveya negra’, que siguen evolucionando y tando mui vivos nel directu, adaptándose perbién a los cambeos de formación y la voz de la so actual cantante.
Col públicu calecíu y dispuesto a dalo todo, entamó ya la presentación del discu nuevu. Pa ello, contaron cola presencia de María Latores enrriba l’escenariu pa facer la intro del cantar ‘Candil’, a panderu y voz. El conciertu siguió colos temes ‘Ente los sos brazos’. ‘Poles bales a Víctor Jara’ y ‘Miseria democrática’, cargaos de la rabia que-yos aporta el soníu más contundente d’esti nuevu álbum y les lletres con conteníu social y alcordanza de los y les que lluchen.
Dempués foi el turnu de ‘Ochobre’l 34’, tema del so anterior trabayu que ye ún de los himnos del grupu y el so públicu. Pa siguir coles collaboraciones, el tema ‘Sélo’ foi acompañáu a la voz pola cantante Pitxe, referente na escena al formar parte de bandes como Skontra o Brutus Daughters. Col siguiente tema ‘Los naides’, na sala yá yera un clamor el glayíu del so coru “Los naides, los fíos de naide”, recordando al gran Eduardo Galeano. Y el repasu a los temes del nuevu discu siguió con ‘Escuela d’amor’, tema del qu’acaben d’estrenar vidiuclip grabáu nel so conciertu de San Mateo y nel que tien l’honor de salir ente’l públicu l’autor d’esta crónica.
«N’Autodefensa, Muyer’ varies moces d’ente’l públicu subieron al escenariu, recordando de forma mui importante que la escena punk tamién tien de ser un espaciu seguru pa les muyeres»
La nueche siguió con ‘Sobredosis de grisú’ y la versión n’asturianu de Som del grupu catalán Obrint Pas, qu’Ochobre titula ‘Somos’. Asina llegamos a los últimos temes de la nueche con ‘Llicenciáu en barricaes’, tema que tien que saber de memoria cualquier iniciáu na escena punk-folk asturiana y pertenez al grupu del que mayores influencies tien Ochobre, que nun ye otru qu’Avientu. Siguío del tema ‘Autodefensa muyer’, que, anque ta nesti discu nuevu, ya salió como single en 2021 y ye ún de los temes más conocíos y coreaos de la banda. Nesti cantar varies moces d’ente’l públicu subieron al escenariu, recordando de forma mui importante que la escena punk tamién tien de ser un espaciu seguru pa les muyeres.
L’últimu tema de la nueche foi mui especial poles collaboraciones, que foron las de Xandru de Skama la Rede acompañando a Natalia a la gaita y la de Humber, conocíu por ser cantante del grupu Misiva. Zarru perfectu pa una nueche de punk asturiana al más altu nivel y que nin el grupu nin el públicu van olvidar en muncho tiempu.
L’ambiente embaxo l’escenariu foi impresionante tol conciertu y la xente quedó con ganes de más. Bona parte del públicu y de los grupos siguieron a la post-fiesta nel míticu Pub La Luna d’Uviéu pa disfrutar del meyor calimochu y siguir faciendo pogos a ritmu de punk.
«El conciertu nun foi namás música: foi un espaciu de resistencia cultural, de reivindicación y d’afirmación colectiva. La Sala Gong convirtióse nuna pequeña trinchera onde la rabia y l’esperanza camudaron en canciones»
El conciertu nun foi namás música: foi un espaciu de resistencia cultural, de reivindicación y d’afirmación colectiva. La Sala Gong convirtióse nuna pequeña trinchera onde la rabia y l’esperanza camudaron en canciones.
Ochobre demostró que La rabia nos dientes ye un discu que gana vida nel escenariu, que se bailla y se vive coles sos lletres y la so música. Y con Entretiempo como cómplices, la nueche foi un recordatoriu de que’l punk-folk asturianu nun ta muertu y vamos tener Ochobre (y esperamos que munchos más grupos) pa tiempu.
La presentación d’Ochobre n’Uviéu foi un auténticu pasu alantre na so trayectoria: un conciertu intensu, cargáu de mensaxe y emoción, con un públicu entregáu y una Sala Gong que vibró hasta’l final. La rabia, la música y la comunidá toparon el so espaciu perfectu.
Suscríbite a les nuestres novedaes
