Dende cuantayá la banda avilesina de rock astur Dixebra tiene por costume zarrar la temporada con un conciertu especial nos últimos díes del añu, nesti 2025 la fecha va ser elviernes 26 d’avientu, a partir de les 21h, na salaTribeca Live d’Uviéu. Les entraes tienen un preciu de 15 € antemanada y de 18 € na taquilla, yá tán disponibles nel local El Quinto (Plaza de Riego, 10) y nel portal https://epticket.com/es/events/dixebra-n-uvieu.
Esti conciertu —de dos hores de duración— ye yá un ritual pa munches y munchos de los sos siguidores, que faen d’él dalgo mui especial pol ambiente que se crea. Amás, ye un momentu de realcuentru colos que tán emigraos d’Asturies por motivos llaborales o d’estudiu. Efectivamente, una gran parte del públicu asistente aprovecha la so estancia equí pa volver a ver a la banda y convierte’l conciertu nun puntu d’unión colos sos amigos y amigues.
Otra manera, nel añu 2027 van cumplise los cuarenta años de trayectoria ininterrumpida de Dixebra, na que publicaron diecisiete trabayos discográficos y tienen actuao per toa Asturies, l’Estáu español y Europa, representando a la nuestra tierra y a la llingua asturiana en bien d’eventos y festivales. Por cuenta d’ello, tán organizando una xira de conmemoración que va escomenzar l’añu que vien y va llegar hasta esi 2027. La mesma va llevalos a tar presentes en munchos escenarios, nos que van facer un repasu pola so obra y ufiertar el so directu contundente, nel que combinen los diferentes estilos presentes na so propuesta: rock, punk, reggae, ska, funk o folk, ente otros
Suscríbite a les nuestres novedaes
