Yá pue sentise en toles plataformes musicales y ver el videoclip de ‘Tengo de subir al puertu’, el single nuevu d’Ún de Grao. El músicu moscón reinterpreta esta tonada tradicional con un formatu novedosu nel qu’entá nun tenía nada publicáu: inclúi guitarra eléctrica y acústica tocaes por él mesmo; batería y baxu grabáu por Luis Senén Fernández; y tecláu rhodes y órganu hammond por César Latorre. D’esta manera convierte esta pieza nun viaxe musical de seis minutos nel que rescampla la influencia del rock progresivu.
«Yo siempre digo qu’esti proyectu d’Ún de Grao tien un componente importantísimu de la mio cultura musical que ye eminentemente del rock de los 70. Tanto’l progresivu, como esos primeros grupos del hard rock, que llueu desembocó nel heavy y demás: Black Sabbath, Led Zeppelin, Deep Purple, Rainbow, Pink Floyd…», desplica José Martínez Álvarez, músicu que ta tres del nome artísticu d’Ún de Grao. Sorraya que siempre tuvo la idea de «fusionar tonada con rock duru», pero que si nun lo llevó alantre foi por cuestión de «perres, medios, organización…». «Pa facer esto tienes que contratar a xente o tirar de favores y ye dalgo que nun me gusta, porque considero que ye esplotar a los colegues»; añade’l músicu qu’a la fin pudo facer esti tema gracies al llabor de Senén -responsable de grabar el tema nos estudios 15:40– y del pianista César Latorre.
Xunto a estes collaboraciones, Ún de Grao toca tamién la guitarra eléctrica per primer vez nesti proyectu. «Faigo un solu nel que refuerzo’l tema armónicamente faciendo dibuxos durante los últimos tres minutos del tema», comenta Martínez Álvarez destacando amás que nel videoclip qu’acompaña al cantar vese lo que ta tocando y cómo lo ta tocando. En cuantes al videu, recalca que ta fechu «caseru dafechu, con poquísimos medios«, por dificultaes económiques: «tardé tanto en sacalo polo típico; quies facer un videu, pero pides presupuestu, parezte mui caru, nun t’atreves a sacalu, déxeslo aparcáu y al final decides facelo dos años dempués de la manera más barata, que ye lo que tenía que facer dende l’entamu».
Esti cantar forma parte d’una triloxía de temes nuevos qu’Ún de Grao fixo dende l’andanciu y que foi publicando nesti tiempu. El primeru qu’asoleyó foi ‘Viva Grau‘ (2023), el siguiente ‘Tiráu na calle‘ (2024) y agora ve la lluz esti ‘Tengo de subir al puertu’. «Fíceles cuando’l confinamientu y son un reflexu d’hasta qué nivel ta ún de retrasu col trabayu y cómo afecta la falta d’estructura, la precariedá y demás nel ritmu de dir sacando pieces«, añade’l músicu bromiando nesti sen: «gustaríame sacar un tercer discu, pero al ritmu que voi igual muerro enantes».
Mentanto, pue disfrutase del so EP Ún de Grao (2017), del discu Pelo Segao (2018) y d’estos tres singles últimos; unos llanzamientos nos que’l músicu moscón fai la so aportación p’anovar l’asturianada cola so guitarra en mano, la so finura nos arreglos y influencies de sonoridaes como la bossa nova, el blues, el jazz y agora tamién el hard rock y rock progresivu.
Suscríbite a les nuestres novedaes
