PVXARRA estrena’l single MARCHA (MARCHA)

PVXARRA presenta ‘MARCHA (MARCHA)‘, un tema nuevu que xurde de la frase “¿Cómo nun marches a la capital a buscar trabayu de lo tuyo? N’Asturies nun hai nada…”. Los tres miembros del grupu, criaos en pueblu, destaquen que nun conciben desarrollase n’otru llugar que nun seya Asturies, y que la idea de marchar pa perseguir un suañu nun ye del so gustu. La banda añede que-yos molesta esa idea de «marcho d’Asturies pa perseguir el mio suañu…”., ye como, tiu, si’l to suañu va suponer marchar pa date de codazos con una montonera mas de xente de provincia que va a la capital cola mesma idea… pues nun sé, hai que quedase y formar comunidá! Nun hai otra».

La lletra describe lo que sentiría una persona nuna gran ciudá que nun siente que pertenez a ella, y reflexona sobre l’agobiu de la inmediatez y la sensación de que constantemente se-yos quier vender algo. L’estribillu funciona como una conversación que representa: los xóvenes que nun quieren marchar (“nun queremos marchar d’equí”), la voz que suxere que “nun hai quien medre” y lo que sienten una vegada que marcharon (“marcha de míila mio identidá nun tien sentíu nesta ciudá”).

«Si’l to suañu va suponer marchar pa date de codazos con una montonera mas de xente de provincia que va a la capital cola mesma idea… pues nun sé, hai que quedase y formar comunidá! Nun hai otra»

PVXARRA esplica que’l tema empieza con un sample de ‘Muchas flores’, xugando cola dualidá de la pallabra “marcha”, que per un llau alude a la ciudá marchosa que promete diversión y, per otru, al imperativu de marchar. Añeden que tamién s’escucha ‘Un atasco de la plata’, cantar que critica Madrid según la so propia interpretación, y que’l sample de Dark la Eme prácticamente lo pedía’l cantar; metímoslu a mou de chisgu, y llama l’atención cómo, 20 años depués, sigue teniendo sentíu”.

La banda de Siero suma con esti cuatro singles espublizaos, esti últimu con videoclip grabáu en delles marquesines de Turón y Siero. Amás, van presentase en sociedá’l día 7 de febreru, yá que la so actuación dientro del Semando Fest ye la primera que van ufiertar. Les entraes tán disponibles equí.