La cantautora asturiana Vero Rubio va actuar esti sábadu 24 de xineru, a les 20:00 hores, na Residencia lliteraria y artística Musa Cafeína, en Quintueles, nun conciertu acústicu de calter íntimu que marca un puntu d’inflexón na so trayectoria musical.
L’actu forma parte de la programación estable de la residencia y va celebrase nel espaciu conocíu como “Acústica Cocina”, una propuesta singular qu’apuesta pola cercanía ente artistes y públicu. La entrada va ser d’entrada inversa, con una aportación ente 5 y 20 euros, y ye necesaria preinscripción previa.
Pa Vero Rubio, esti conciertu tien un significáu especial. La cantante destaca’l venceyu personal col proyectu y cola so impulsora. «Ana foi la primer persona que me convidó a facer la mía música nun eventu suyu, unas Baresías fai nun sei cuánto… prepandemia. Repetir precisamente agora, ía cumo zarrar ya dar comienzo a un ciclu nuevu pa mi». El llugar tamién xuega un papel clave nel espíritu del conciertu. Rubio describe Musa Cafeína como un espaciu que convida a la escucha: “Ye pequenu, pero ensin sentite zarráu; ye íntimu, atopadizu… apetez tar ya quedar… apetez sentise”.
Amás, el momentu vital y profesional nel que llega esti directu fai que nun seya un conciertu más. L’artista anuncia una etapa nueva, con música recién creada y un procesu de crecimientu personal y creativu. “El conciertu d’esti sábadu nun va ser el ‘Vou’ de fai un añu… Yá toi llegando a sitios… Tengo música nueva… Medréi… y faime especial ilusión tener la oportunidá d’enseñavos tou esti camín percorríu”.
«Yá toi llegando a sitios… Tengo música nueva… Medréi… Y faime especial ilusión tener la oportunidá d’enseñavos tou esti camín percorríu»
Dende la organización, Ana Lamela, directora de la Residencia artística Musa Cafeína, esplica que’l proyectu nació cola vuelta a Asturies de la so compañera Laura Cuervo y cola idea de convertir un espaciu rural nun focu de creación contemporánea: “La so casa en Quintueles inspiró esta idea de convertir un espaciu rural na Residencia artística Musa Cafeína”.
El proyectu empezó a desarrollase nel branu de 2025 y dende ochobre cuenta con programación continuada de conciertos y talleres multidisciplinares, venceyaos a la lliteratura, la escritura, la voz o dibuxu. Nel casu del directu de Vero Rubio, Lamela destaca’l componente afectivu, ensin perder de vista la calidá artística. “Ye la nuestra compañera y amiga, pero nun ye’l primer conciertu de la Residencia: el primeru foi de Lea Poldo y foi una maravilla .La idea ye aportar ternura, cercanía y ciñu a la cultura y a les artistes que vienen a tocar, recitar o compartir el so proyectu con nosotres”, afirma.
La residencia artística Musa Cafeína tien yá programación cerrada hasta abril y confía en siguir medrando cola rempuesta del públicu. El conciertu de Vero Rubio preséntase, asina, como una oportunidá única pa esfrutar de la so música nun formatu íntimu, cercanu y cargáu de sentíu.
Suscríbite a les nuestres novedaes
