La XIV edición del Concursu de Canción Asturiana Conceyu de Siero aporta a les semifinales. Esti domingu 1 de marzu a les 11.30h el Teatru Auditoriu de La Pola (Siero) acueye la primer semifinal na que van competir once de los ventiocho semifinalistes clasificaos pa ún de los eventos institucionales más veteranos dedicaos a l’asturianada.
Les y los cantadores que participen esti domingu en La Pola son: Diego Pérez Sánchez (Siero), Piedad García Guerra (Xixón), Manuel Roza Llera (Colunga), César González Fernández (Somiedo), María Latores (Uviéu), José García García (Cangas del Narcea), Valentín García Rodríguez (Grau), Fernando Entralgo Vega (Xixón) y Alicia Villanueva Megido (Bimenes). Amás Piedad García compite tamién na modalidá de canción ayerana; y na de canción dialogada María Latores y Odón del Paganéu y Sandra Álvarez Díaz y Fernando Entralgo Vera.
El gaiteru oficial ye Valentín Fuente y el presentador ye Miguel Ánxel Montenegro. Esti certame ta entamáu por AFATRA (Asociación de Folclore Amigos de la Tradición) col sofitu del Ayuntamientu de Siero y va celebrase hasta’l 19 d’abril tolos domingos nel Teatru Auditoriu de La Pola. El 10 de mayu va ser la gala de premios d’esti concursu que ye clasificatoriu pal Premiu Nacional Obdulia Álvarez «La Busdonga» d’Asturianada.
Suscríbite a les nuestres novedaes
