Vuelve ún de los festivales más veteranos y con más personalidá de la escena rockera d’Asturies. El 3 y 4 de xunetu la llocalidá d’Intriago (Cangues d’Onís) va acoyer la XII edición del Maizu Rock y, ente les bandes yá anunciaes, hai una del rock astur: Ochobre. La xoven formación va presentar el so trabayu nuevu, La rabia nos dientes, nesti eventu gratuitu y ensin animu llucrativu que siempre apuesta por programar bandes rock, punk o metal n’asturianu. La organización avanzó qu’esti añu tamién actúen Deklibe, Ritmo Vudú y Maverick.
Ochobre ye una banda creada en 2016 que son heriede del rock astur, con una propuesta qu’entemez punk, rock y folk, amás de dalgunes influencies hardcore-metal y ska. To ello con unes lletres enllenes de compromisu social y reivindicación. Tres d’estrenase discográfica en 2018 col EP Sobredosis de Grisú y tener dellos cambios de formación, el pasáu añu publicaron La rabia nos dientes, un trabayu mui completu que reflexa la so evolución como banda.
Cola confirmación de la so actuación nel XII Maizu Rock, esta xoven banda va enllenando l’axenda de conciertos pa esti branu: el Válgame Fest de Cabrales y los festivales foriatos Barbaño Rock (Badajoz), Faberock (El Bierzo), Vendaval Fest (Ribadeo) y La Raya Rock (Badajoz), son dalgunes de les cites nes que va poder vése-yos en vivo esti branu.
Suscríbite a les nuestres novedaes
