Hai trés selmanes abrió en Xixón la nueva tienda y espaciu cultural de Puru Remangu, un llocal asitáu nel centru la ciudá -na cai Llibertá; paralela a la cai Corrida- que da agospiu tamién a Musicasturiana.com. Nél ta a la venta tol catálogu de la tienda online, con más de 500 referencies disponibles, nun horariu comercial qu’abre de llunes a vienres de 11h a 14h y de 17h a 20h, y los sábados de 11h a 14h. Amás, la planta superior da abellugu a la oficina de la Redacción del mediu de comunicación y hai un espaciu nel que poder grabar conteníos audiovisuales pa Musicasturiana.com y entamar delles actividaes venceyaes a esti proyectu.
Tamién la música asturiana tuvo mui presente na folixa d’inauguración d’esti llocal, na qu’actuaron too artistes llocales. Asina ye como una pareya formada pol gaiteru Llorián García y la tamboritera Vanessa Areces y los bailladores tradicionales Nelson Díaz y Marina Rodríguez foron los encargaos d’abrir l’actu. Tres d’ello, los responsables de la marca fueron presentando caún de los espacios del llocal alternándolo con actuaciones rellacionaes con caún d’esos espacios. D’esta manera, na Antoxana actuó’l Coru Xorrecer; nel espaciu de Musicasturiana.com cantó asturianada Mapi Quintana y nel d’Artístiques (na que se venden vinilos y llibros creaos por muyeres y/o en llingües minorizaes) recitó Sofía Castañón. La última de les actuaciones foi la d’Alicia Álvarez nel Requexín de la reciella, l’espaciu dedicáu al públicu infantil.
La reivindicación d’una ciudá con identidá propia, del comerciu llocal, de la cultura’l país, de crear comunidá y de resistir a la xentrificación, turistificación y privatización del espaciu públicu tuvo presente en toles intervenciones que les artistes participantes fixeron esi día. Tamién cola acción amás de les pallabres, porque les más de 200 persones qu’asistieron a la inauguración ocuparon esi día la cai y cortaron la carretera pa baillar al son de la música’l país.
Cola apertura d’esti llocal, Musicasturiana.com da un pasu más nel camín d’un proyectu que nació como tienda online en 2017 en Madrid -cuando’l so responsable, Xicu Ariza, taba emigráu ellí-; qu’en 2021 se reconvirtió como mediu de comunicación; y que nestos nueve años de trayectoria impulsó delles iniciatives en sofitu de la música’l país como’l Semando Fest, el ciclu de presentaciones de discos Amosando, o Sienti, la guía de la música asturiana, que va asoleyar enantes d’acabar l’añu. Agora, la so tienda online, amás de tar abierta 24/7 per Internet, tamién furrula nun espaciu físicu nel centru de Xixón.
Suscríbite a les nuestres novedaes
