El domingu pasáu a les 22.45h TPA estrenó Basáu en fechos reales, un espaciu protagonizáu por José Ángel Hevia que, a lo llargo de nueve capítulos, recupera la memoria venceyada a la música tradicional asturiana. A traviés de les histories que’l gaiteru sintió de quien-y precedió, el programa ufre una mirada cercana a una heriede na que música, tradición oral y memoria fúndense pa caltener y tresmitir una parte fundamental del patrimoniu cultural d’Asturies.
El proyectu nació durante les xires d’Hevia per Italia onde, enantes de los sos conciertos, contestualizaba énte’l públicu la música que llueu interpretaría enriba l’escenariu. N’aquellos alcuentros mentaba a referentes como Remis Ovalle, Los Carbayones, Armando Fernández Robledo, La Mariñana, Ignacio el de San Roque, El Gaiteru de Veriña o Fariñas, asina como a les histories qu’acompañaben a la música de raigañu. L’espaciu recupera, amás, la memoria de la xeneración que va cincuenta años garró de los sos mayores el relevu de la gaita y el tambor y que foi bautizada como La quinta del biberón.
«Basáu en fechos reales ye una declaración d’intenciones. Va décades los vieyos compartíen con nós nes sos cocines rurales les sos histories, la so tresmisión oral. Como eso yá nun pasa vamos da-y a esa tresmisón oral una oportunidá nos formatos audiovisuales«, desplicaba’l míticu gaiteru maliayu sobre esti proyectu cuando lo presentó a primeros del añu pasáu. Dempués d’asoleyar siete capítulos na so canal de YouTube, la serie completa de nueve episodios aporta agora a TPA 7, onde s’emite domingos a les 22.45h. Tamién va poder vese online en TPA a la Carta y nel canal de YouTube de RTPA.
Suscríbite a les nuestres novedaes
