El Conceyu de Xixón abrió’l plazu d’inscripción pal II Concursu de Pop-Rock Villa de Xixón “Rock Xixón”, Premiu Alberto Toyos, el pasáu 1 d’abril, una iniciativa que busca afitar y dar visibilidá a nuevos talentos de la escena musical asturiana.
Les bandes y artistes interesaes van poder presentar la so candidatura hasta’l próximu 20 d’abril al traviés del formulariu habilitáu na web municipal, onde tamién se recueyen les bases de participación. La convocatoria ta dirixida a bandes y solistes con vinculación al territoriu asturianu, un criteriu que busca reforzar el texíu musical propiu y dar visibilidá a proyectos que, munches vegaes, tienen dificultaes pa acceder a circuitos más amplios.
Un total de nueve bandes van escoyese pa participar nes eliminatories, que se van celebrar en trés conciertos na Sala Acapulco los díes 15, 22 y 29 de mayu. En cada sesión van actuar tres grupos. D’estes actuaciones van salir les dos bandes finalistes. Les bandes participantes, amás, van formar parte d’una campaña de promoción que va incluyir la creación de material audiovisual —vídeos y fotografíes— y acciones de contactu con sellos discográficos profesionales.
La final va celebrase nel Xixón Arena, onde van participar les dos meyores bandes del certame escoyíes pol xuráu. L’eventu va contar con un artista invitáu de reconocíu prestixu, y el nome del grupu ganador va dase a conocer enantes de la so actuación, momentu nel que se va facer entrega del gallardón. El premiu pal ganador consistenuna actuación a caché dientro de la programación de conciertos del Branu de Xixón, amás d’un bonu valoráu en 2.000 euros y troféu. El segundu clasificáu va recibir un bonu de 800 euros y troféu.
Unu de los aspectos destacables d’esta convocatoria ye la posibilidá de participar con propuestes n’asturianu, reforzando asina la presencia de la llingua propia dientro de los circuitos musicales contemporáneos. D’esta manera, el concursu abre la puerta a una mayor diversidá estilística y llingüística, nun momentu nel que cada vez más bandes incorporen l’asturianu como vehículu creativu.
Suscríbite a les nuestres novedaes
