La Conseyería de Cultura, Política Llingüística y Deporte del Principáu d’Asturies abrió una nueva convocatoria de subvenciones destinaes a la normalización y promoción del asturianu y del gallego-asturiano o eonaviego, una llinia d’ayudes que tamién abre una vía de financiación relevante pa proyectos musicales y certámenes venceyaos al usu de la llingua propia.
Esta convocatoria, tramitada en réxime de concurrencia competitiva, ta dirixida a empreses, asociaciones y fundaciones de calter cultural que desarrollen actividaes orientaes a fomentar la presencia social de la llingua asturiana. El plazu pa la presentación de solicitúes ye de 20 díes hábiles dende güei, ye dicir, el 17 de febreru, y la tramitación pue realizase tanto de forma electrónica como presencial al traviés de los canales habilitaos pol gobiernu asturianu.
La convocatoria asciende a los 120.000 euros, repartíos en 70.000 euros pa la llinia 1 (empreses) y 50.000 euros pa la llinia 2 (entidaes ensin ánimu de lucru), pudiendo financiase hasta’l 100% del proyectu, siendo l’importe máximu de 30.000 euros.
Pa la escena musical asturiana, esta llinia d’ayudes supón una oportunidá concreta pa reforzar la presencia del asturianu nos escenarios, dar visibilidá a proyectos culturales con identidá llingüística y facilitar la profesionalización d’iniciatives musicales que contribúin a la dinamización cultural del territoriu. D’esta manera, les bases reguladores de la convocatoria recueyen que se podrán presentar a esta sovenciones actividaes como «certámenes musicales o lliterarios n’asturianu o gallego-asturiano o eonaviego» y «proyectos musicales realizaos íntegramente en llingua asturiana o en gallego-asturiano o eonaviego».
Suscríbite a les nuestres novedaes
