L’asociación sociocultural Abierto Hasta el Amanecer entama una nueva edición del so conocíu Concursu de Música en Directo, que llega yá a la so XXIII edición y que se va celebrar los próximos 21 y 22 de marzu coles semifinales y la gran final nel CMI El Coto.
El certame abre les sos puertes a solistes y grupos de cualesquier estilu musical, dende rock hasta electrónica, pasando por rap, folk o fusión. Amás, les bandes participantes van poder incluir versiones nel so setlist ensin nenguna llende.
Les inscripciones tán abiertes hasta’l 6 de marzu y pueden presentase moces y mozos de 13 a 35 años procedentes de cualesquier puntu d’España. La organización pon a disposición de los interesaos el formulariu d’inscripción na so páxina web oficial.
El primer premiu va ser de 600 euros, y repártense tamién premios económicos pa los otros cuatro finalistes, toos ellos pa canxear en Pronorte. El concursu va otorgar tamién el Premiu al Meyor Grupu Revelación, dotáu con un bonu económicu de 100 € en material musical canxeable na tienda Musical Tommy, amás d’un detallu conmemorativu. Esti premiu ta destináu al meyor solista, duetu o grupu que nun participara en ediciones anteriores del concursu, y va dase prioridá a los proyectos formaos por participantes que nun pasen de los 20 años.
Mientres los conciertos, el xuráu va valorar diversos aspectos fundamentales que sumarán hasta 50 puntos en total. Tendránse en cuenta la calidá rítmica y musical, la calidá compositiva, la calidá vocal, la puesta en escena y la estética y, finalmente, la respuesta del públicu, caún d’ellos puntuáu con un máximu de 10 puntos.
Como n’ediciones anteriores, el concursu va tener un marcáu calter accesible y de baldre, pa que cualesquier aficionáu a la música puefa esfrutar de les actuaciones como espectador. Les bases completes tán disponibles calcando equí.
Suscríbite a les nuestres novedaes
