22 años de camín, 8 llanzamientos discográficos, milenta conciertos, collaboraciones con pernomaos artistes del xéneru, dellos premios… Nestes dos décades de trayectoria Alfredo González algamó a ser ún de los cantautores más reconocíos d’Asturies. Pero too tien un final y, tres d’anunciar el pasáu mes de xunu que diba poner fin a la so carrera, el músicu turonés ta acabante d’anunciar el so caberu conciertu: el sábadu 25 de payares na Sala Club del Centru Niemeyer d’Avilés. Amás, va asoleyar dos temes nuevos pa poner el ramu a la so discografía.
A les 20h y con un preciu d’entrada de 12 € va celebrase esti últimu recital que lleva por nome Se Parece al Final. Nél, el cantante, pianista y compositor va facer un repasu per tola so trayectoria amás d’interpretar lo que va publicar dientro del EP tamién nomáu Se Parece al Final. Esti llanzamientu van formalu dos cantares -ún n’asturianu y l’otru en castellanu- y va asoleyar esta seronda.
La Pola L.lena el 22 d’ochobre, Madrid el 27 y 28 d’ochobre y el Niemeyer n’Avilés el 25 de payares van ser los últimos conciertos del cantautor. Alfredo González desplica que la idea ye actuar él solo «por caltener esa idea de tar como entamé, namás col pianu y cola voz» y zarrar asina’l círculu de dos décades de camín . En cuantes al futuru ye claro: «Considero que los 22 años de carrera son abondo y tengo ganes d’entamar coses nueves, porque la música nun sé si la pueo dexar. Yá hai dalgunos proyectos que tán en mente, anque nun sé cuándo saldrán».
Discografía n’asturianu
La música d’Alfredo González suena una canción d’autor influyía por estilos rock o l’indie. Ente la so discografía rescampla La Nada y Tu, del añu 2009, que ta n’asturianu dafechu y que ye’l más gallardoná, con premios como’l Meyor Cantar en Llingua Asturiana o’l Premiu de la Crítica RTPA al Meyor Discu d’Autor. Con él tienen collaborao escritores de sonadía como Pablo Texón -col que firmó’l discu Dobleces-, o músicos como’l reputáu Quique González, que llegó a cantar n’asturianu nun tema. Asuntu de Fe ye’l so caberu trabayu en llingua asturiana qu’asoleyó en setiembre del pasáu añu. Pel mediu, el músicu trabayó nel so idioma maternu componiendo p’artistes como Silvia Quesada, Muyeres, Alienda…, llanzó’l cantar «Pentotal» nel so anterior discu Afluentes y la canción pal IX Día de la Reciella «L’asturianu conéctate«.
Suscríbite a les nuestres novedaes
