Algaire llancen el so primer single: “Llume”
Yá ta en toles plataformes dixitales “Llume”, l’adelantu del primer discu d’Algaire ‘Coral y Maera’. Trátase d’una muñeira compuesta por Luis Ángel Fernández Santos pero arreglada con un soníu rockeru. Esti mecigayu musical ye un avance de lo que va poder sentise’l 5 de marzu cuando asoleye’l discu completu: una base de música tradicional asturiana amestada a sonoridaes más actuales que van dende’l pop hasta la música urbana.
«Luis Ángel Fdez Santos ye una persona venceyada al baille tradicional y asina lo reflexa na temática de la lletra, qu’emplega una narrativa costumista rellacionada col amor campesinu al más puru estilu tradicional», cometa Loreto Suárez, una de les tres vocalistes y pandereteres de la formación xunto a Iratxe Espina, Carla Miranda y el guitarrista Juan Yagüe. Sicasí, añade que’l compositor «como contrapuntu, quixo imprimi-y un calter más roqueru y actual na melodía utilizando cuartetes hexasilábiques, que ruempen cola construcción típica, tradicionalmente octosilábica». «La condición que nos puso foi que quería un arreglu rockeru pa esta muñeira, y asina lu ficimos», matiza.
Con esti single, Algaire anticipen parte de lo que se va poder sentir el 5 de marzu con ‘Coral y Maera’. Un trabayu que, como comenta Loreto Suárez, incorpora nueves sonoridaes que-y dan «un calter modernu a los arreglos de los temes pa qu’esta diversidá sonora avere la música tradicional a un públicu más ampliu». Xunto a elles, renomaos músicos como José Manuel Tejedor, David Varela, Juanjo Díaz, Fruela 757, Richard García, J.C Vega “Cabín”, Xosé Antón “Ambás”, y los gallegos Gaudi Galego y Xabier Díaz, s’encarguen d’aportar la so esperiencia pa da-y más color a ún de los álbumes más esperaos de la temporada.
Conciertu’l 5 de marzu
Amás del llanzamientu, el 5 de marzu va ser el conciertu presentación del discu. A les 20h nel Auditoriu Teodoro Cuesta y con entrada de baldre Algaire van dar un espectáculu pa que tán preparando «una puesta n’escena especial» y nel que van «tratar de curiar tolos detalles pa facer qu’esi día quede grabáu na memoria del grupu y na de quien vaya a velo», desplica la componente d’esti cuartetu formáu en Mieres en 2020.
