Misiva anuncien nuevu videoclip y llancen teaser d’adelantu

Tres estos casi dos años de parón y yá recuperaos de nun poder celebrar el X Aniversariu en 2020, los moscones Misiva vuelven a la carga con una riestra de novedaes que va facer que toda esta espera pagara la pena.

Conciertu X+II Aniversariu, temes nuevos, videoclip, nueva imaxe… Y sobre too un puntu d’inflexión na banda que paez dexar pa prau aquella atmósfera apocalíptica y murnia que presentaran nel so trabayu caberu “L’Ultimu Aliendu”. En pallabres d’ellos “tamos fartos de males noticies, de nun poder ver a la xente, a la familia, de nun poder tocar nin dir a conciertos, de nun vevos, de nun sentivos… Queremos qu’esto sía un chute d’enerxía pa encarar esti final del andancio y que nos volvamos a ver coles ganes de dexar esto atrás pa siempre”. Esti sentir ocúpalo too. Tresmítese na nueva imaxe, obra como siempre del tamién moscón Rubonón, con collores más vivos, con elementos más “entusiastas”… Y nótase tamién nel soníu y na lletra del tema homónimu que tan a piques de presentar xunto con un videuclip fechu como davezu por Titi Muñoz.

“La Misiva”, que ye como se llama’l cantar qu’escoyeron d’entre tolos que compunxeron durante la pandemia, ta grabáu nos estudios OVNI con Pablo Martínez y fala d’esti nuevu estáu d’ánimu de los de Grau. Fala de que magar los confinamientos, les restricciones y tolo que tuvieron que dexar pa un llau; magar que los más de 10 años que lleven y de que va pasando’l tiempu pa toos; ye dicir, magar toles llaceries que-yos puedan pasar, Misiva “sigui’l so camín”. Y sigui’l so camín cola mesma enerxía de siempre, cola mesma ilusión pero ensin complexos y quitándose tolos corsés que podíen tener si ye que dalguna vez los tuvieron. 

MIRA’L TEASER DE MISIVA

Conciertu X+2 Aniversariu

Por eso quieren qu’esti añu sía l’añu de volver entamar. El de volver a la normalidá ¿y qué meyor que retomando aquello que meyor saben facer? El próximu 12 de marzu a les 21.30h, la sala Gong d’Uviéu va acoyer el conciertu X+2 Aniversariu de Misiva col que repasen estos doce años n’activo. Nun comunicáu anuncien que va ser «un conciertu especial, con delles sorpreses y invitaos». Les entraes pal conciertu -nel que van tar acompañaos de Los Bárcenas-, yá se pueden mercar online o en La Bomba Records d’Uviéu por un preciu anticipáu de 10 euros.

Comprar discos de Misiva na tienda online