Pandereta, poesía y feminismu esti domingu en Nava
Esti domingu 20 de febreru a les 13h, el CSA L’Apiaderu d’El Remediu (Nava), acueye un eventu qu’axunta poesía, pandereta y feminismu. La escritora xixonesa Ana Lamela va facer el so recital de poesía ‘La Otra’ y nél va tar acompañada del grupu de pandereteres feministes Nun Tamos Toes.
Ana Lamela asoleyó apocayá’l so nuevu trabayu discográficu tituláu ‘Poética d’un carbayu’, col que s’estrena como cantautora. Fírmalu embaxu’l nome de Tierra y nél recuéyense nueve cantares onde pon música a otros tantos poemes d’autores como Julia Navas Moreno, Alfredo Garay, Ángeles Carbajal, Pedro Luis Menéndez, Vanessa Gutiérrez, Marta Mori, Esperanza Medina o Armando Vega. Esti trabayu preséntase como un proyectu de difusión y fomentu de la poesía asturiana actual. Del repertoriu incluyíu nél cinco temes tán en llingua asturiana, con estilos que van de la canción d’autor al pop y hasta la ranchera o l’indie-folk.
Nun Tamos Toes ye una agrupación de pandereteres que fai música tradicional dende una perspectiva feminista. La formación nació a finales de 2018 en Nava y dende aquella fueron llevando les sos panderetes y los sos voces enllenes de mensaxes reivindicativos a bien de movilizaciones y conciertos per tol país. L’eventu poéticu-musical del próximu domingu en L’Apiaderu ye una oportunidá pa ver l’arte entemecíu d’estes dos propuestes culturales.
