Alicia Villanueva y Luis Francisco Álvarez Pola, primera confirmación del Semando Fest

Alicia Villanueva y Luis Francisco Álvarez Pola son dos de los nomes que protagonicen el relevu xeneracional na tonada asturiana y van representar a esti xéneru nel Semando Fest.

Alicia Villanueva (Bimenes, 2000). Entamó a cantar tonada con namás 9 años. Alumna d’otra figura pionera –Anabel Santiago– y nieta y bisnieta de dos muyeres cantores d’asturianada, tien participao en concursos de canción asturiana dende que yera una neña, clasificándose nos primeros premios en varios d’ellos como’l XXXIX Concurso de la Canción Asturiana de El Comercio o’l XXII Concursu de Tonada de La Nueva. Ye ensin dulda, ún de los nomes de futuru de l’asturianada.

Luis Francisco Álvarez Pola (Bárzana de Quirós, 1994) ye doctor en Musicoloxía tres d’algamar un sobresaliente cum laude cola so tesis La música en el concejo de Quirós. Ye multiinstrumentista (gaita, pianu, acordión…) y cantor de mises de gaita, tien acompañao a intérpretes como Anabel Santiago, Héctor Braga o Odón del Paganéu, ye presidente de l’Asociación Folclórica y Cultural Teixo-Manolo Quirós y dirixe la banda de gaites del mesmu nome. Actúa davezu como acompañante d’Alicia Villanueva.