Yá queda menos pa conocer los nomes de les persones ganadores del XIII Concursu de Canción Asturiana Conceyu de Siero. Esti domingu 22 de xunu a les 11.30h el Teatru Auditoriu de La Pola va acoyer la primer final na que van competir un total de diez cantadores. La xornada va tar dedicada a la intérprete de canción asturiana María Luisa Díaz Ordóñez.
Nesta primer final van xubir al escenariu Piedad García Guerra (Xixón), María Latores (Uviéu), Valentín García Fernández (Grau), María Luisa Martínez Suárez (Xixón), Cristina Sánchez Sánchez (El Valle Baju de Peñamellera), Isaac Sierra Longo (Parres) y Lorena Corripio (Colunga). Amás nes estayes de canción ayerana participenLorena Corripio; na de Canción dialogada Cristina Sánchez Sánchez y Manuel Roza Llera, y na categoría moza Marina Carbajosa González (Grau).
Esta primera final -el domingu 29 ye la última- va ser un homenaxe a María Luisa Díaz Ordóñez, figura clave nel mundu de l’asturianada qu’escomenzó la so andadura en 1968. Tien una ventena de canciones grabaes, algamó dellos primeros premios n’importantes concursos del xéneru y tamién foi xuráu de dellos certámenes. A los sos 80 años, sigue siendo toa una institución dientro de l’asturianada y por eso’l Concursu de Canción Asturiana Conceyu de Siero va reconocela esti domingu.
Suscríbite a les nuestres novedaes
