Yá ta en toles plataformes musicales ‘Los naides‘, el segundu adelantu del próximu trabayu d’Ochobre, La rabia nos dientes. Tres d’asoleyar ‘Sélo‘, la banda punk-rock llanza lo que la so gaitera, Natalia González, define como «una sorpresa nel procesu final de composición del discu». «Ye mui distintu al restu canciones: más escuru, más rabiosu, pero con un estribillu melódicu que contrasta radicalmente col versu». A esto hai que suma-y la fuercia de la lletra, inspirada nel testu del mesmu nome del escritor llatinoamericanu Eduardo Galeano.
«L’álbum yá taba compuestu, pero unes selmanes previes a la grabación Viti traxo una idea al llocal. Yera puru hardcore«, desplica gaitera sobre’l nacimientu de ‘Los Naides’. » Encantónos y diximos: pues nada, el discu van ser finalmente nueve cantares y non ocho. Y, ensin decatanos, esti cantar foi la clave de too: dionos el nome del discu, dionos la etiqueta de hardcore que volaba penriba de dalgún tema, pero nun terminaba de manifestase propiamente y reflexó perfectamente’l contraste que queríemos que se notara nesti trabayu discográficu».
En cuantes a la lletra, González desplica que la mayoría de les lletres del discu son d’Adrián Calvillo, anterior cantante de la banda, pero que nesta ocasión nun queríen «pedí-y una última lletra con priesa, a mui poques selmanes d’entamar a grabar». Asina ye como recurrieron a Eduardo Galeano que, pa la gaitera, ye «una figura de referencia mui importante». «‘Los nadies’, un testu mui breve recoyíu n’El libro de los abrazos, lleva resonando na mio cabeza munchos años. Al sentir esti estribillu melódicu tan épicu, frente a la rabia del versu, vínome directamente a la cabeza. Y con esa idea de los naides, los nengunos, los nenguniaos, los probes, los de les llingües minorizaes, los de les cultures arrequexaes… fartos, cansaos, rabiosos, montamos el restu la lletra», afonda la gaitera del grupu.
El resultáu ye lo que Natalia González define como «la canción más arriesgada d’esti discu». Sicasí, matiza que «foi tan natural la forma na que surdió y dio-y tantu sentíu a tol trabayu d’estos años, que necesariamente tenía que ser ún de los adelantos».
El segundu discu d’Ochobre va asoleyase en xunetu y ta formáu por nueve temes que reflexen la so evolución. Musicalmente ye punk-rock con influencies d’otros sones como’l punk melódicu, hardcore, celtic punk o metal. En cuantes a les lletres hai munchu pesu social, munchu compromisu y muncha conciencia de clase. Amás, yá pue acutase en preventa en Musicasturiana.com. Hasta esti llunes 23 de xunu pue mercase’l CD, dellos modelos de camisetes, una sudadera, un tote bag y una llámina.
Suscríbite a les nuestres novedaes
