Esti vienres entama’l Festival Internacional de la Cerveza Artesano d’Asturies. Los Xardinos de la Pinacoteca Eduardo Úrculo de La Felguera (Llangréu) van acoyer esti eventu ente’l 11 y el 13 d’abril nel que la música comparte protagonismu cola cerveza, los foodtracks y les charres. Na programación del vienres 11 van dar el pregón Muyeres (19h) y actuar los grupos venceyaos a la escena n’asturianu Lady Llagar (22.30h) y Skontra (01.30h), pero’l platu gordu pol so formatu y orixinalidá va ser l’espectáculu País Punk Rock (00h), un homenaxe al punk-rock asturianu nel que 15 músicos van tocar repertoriu de clásicos del xéneru.
«La idea surdió porque nel festival que se lleva faciendo dende 2016 en Llangréu tolos vienres se programa punk-rock d’Asturies y viendo que nestos años participaron yá prácticamente tolos grupos, pa esta edición ocurrióseme la idea de xuntalos un poquiñín a toos; facer una especie de tributu pa homenaxear a la escena y cuntar con figures vinculaes a esti xéneru que pudiesen facer collaboraciones ente ellos, facer dúos, facer la canción d’otru grupu…», comenta Pablo Carrera d’A Mansalva, organizador del eventu.
D’esta manera van sonar 14 temes de grupos como Dixebra, Los Berrones, Desakato, Misiva, Skontra, Ochobre, Misiva, Mala Reputación o La Morgue y la esbilla ta formada «polos cantares más conocíos de caúna de les formaciones». La banda va tar formada por Dani León y Juan Bertrand (guitarres), José Manuel Tejedor (gaita), Luis Vázquez de la Torre (batería) y Carlos Álvarez (baxu). Amás Sergio Rodríguez de Tutu Estudios va ser el responsable del soníu.
Pablo Senator (Desakato), Marisa Valle Roso, Ramón Blanco (Los Berrones), Humber Sierra (Misiva), Diego Prieto (Teksuo), Pepo Martínez (Desakato, Onza), Sandra Lusquiños (Alexandra in Grey), Maxi Compán (Fe de Ratas) y Alberto Menéndez (Skontra) son quien van poner voz a los temes. «Propunximos a cantantes de delles bandes si s’animaben a participar y facer un par de temes d’otru grupu que nun tuviera por qué ser la suya y va haber un poquiñín de too. Hai cantantes que van facer ún del so grupu y otros d’otres bandes; tamién va haber dúos mui interesantes», desplica carrera.
«Tamién consideramos que yera importante cuntar con figures de fuera del punk-rock como Marisa Valle Roso o Sandra Lusquiños. Y dientro del repertoriu hai coses como La Morgue que ye más swingcore o Los Berrones que ye agrorock, pero que puen ofrecer esi puntu punk-rock que pue llegar a tener caún de los temes», desplica’l productor mentanto sorraya que-yos paecía interesante «xugar con sacar de la so zona de confort a los cantantes y de repente los cantares que a lo meyor tampoco son demasiao punk rock da-yos esi toque d’esti estilu».
«Nos ensayos la banda ta sonando mui bien», comenta’l responsable d’A Mansalva sobre un procesu que «nun ye fácil» al tener que coordinar «a 15 persones cola so disponibilidá, preferencies a la hora de cantar, a la d’asignar los cantares, etc.». Pesie a too tien enfotu nel resultáu: «animamos a la xente a que vaya velo porque va ser un formatu únicu -quiciabes irrepetible- y préstanos que la xente que tea embaxo y enriba l’escenariu lo vaya pasar mui bien porque ye un formatu que nun se duel dar y que lo facemos con tola buena voluntá del mundu pa que se faiga un homenaxe al punk-rock y se siga visibilizando a esta escena«.
Suscríbite a les nuestres novedaes
