Yá ta en toles plataformes musicales Vou, el primer álbum de Vero Rubio. La multiinstrimentista canguesa publica 11 temes nos que la canción d’autor y la sensibilidá ye’l puntu d’alcuentru y que güei van sonar a les 20.45h nel Teatru de La Llaboral dientro de los showcases de Música en Rede. Pero esti llanzamientu va más allá de la música, porque’l proyectu axunta música, palabra y imaxe y too esto tien reflexu nel llibru de Vou que tamién s’asoleya güei y que yá ta a la venta na tienda online.
D’esta manera Vou ye un ambiciosu trabayu nel que, como desplica Rubio, «cada pieza del proyectu, instrumental o vocal, tien un poema/lletra y un videu que la acompaña, como tres caminos que lleven al mesmu destín». Asina ye como la obra edítase en dos formatos, un CD y un llibru, que contienen caún unes característiques concretes. Nel llibru nárrase la historia de caún de los cantares, recuéyense les partitures y tamién hai fotogrames, poemes/lletra y enllaces pa reproducir la música y l’audiovisual. El CD va salir nes próximes selmanes y compila la música con 11 pieces y un llibretu con un fotograma de caún de los 11 videos, un enllaz pa la so reproducción y un poema/lletra.
«Esti proyectu vien de les mios paranoies, de los mios camientos y de la mio necesidá d’entender, desplicar y poner una banda sonora a cada pasu que doi na vida», desplica Vero Rubio sobre la filosofía de Vou. Nél tola música y lletres tán feches por ella sacantes una melodía de ‘Vou cantar’ -que vien d’una pieza tradicional gallega- y la lletra de ‘el día’ -basada nun poema de Miguel R. Monteavaro-. Tolo demás: igües, videos, producción, voz y demás instrumentación -pianu, distintos teclaos, armoniu, trompa, trompeta, fliscornu y bodhran- ye obra dafechu d’esta artista canguesa.
Sicasí, Rubio nun ta sola del too. L’álbum cunta con varies collaboraciones a la sección de cuerda; cola flauta de Pepín de Muñalén; coles voces y coros d’Anabel Santiago, Puri Penín y l’agrupación vocal femenina Siset; y coles percusiones de Javier Bergia. Los mandos técnicos d’Andy da Silva, la imaxe d’Arturo Santiago y les correcciones llingüístiques de Miguel R. Monteavaro, completen l’equipu que da forma a Vou.
Cola publicación d’esti trabayu Vero Rubio da un pasu más na so trayectoria tres d’algamar el XV Premiu Camaretá al Meyor Cantar con ‘Dixo miou padre‘, xirar per toa Asturies en 2024 y llanzar dellos singles. La so carrera desenvuélvese ente’l mundu de la música clásica, onde tuvo la oportunidá de tocar con orquestes como la Orquesta Sinfónica de Barcelona y Nacional de Catalunya (O.B.C.), y el del jazz. Anguaño, toca en dellos grupos de distintos estilos (folk, rock, improvisación llibre, jazz…): Orquesta Céltica Asturiana, Sonámbulos, Improviso… Amás compaxina esti llabor como instrumentista cola composición y producción de la so música de manera independiente, daqué de lo que se siente’l resultáu nesti trabayu y nel conciertu que va dar esta tarde en Música en Rede.
Suscríbite a les nuestres novedaes
