L’asturianada, esi xéneru musical qu’espresa la forma de cantar más identificativa y única d’Asturies, tien una axenda bien completa esti fin de selmana. Chigres, concursos y places son l’escenariu d’una programación que s’esparde per Piloña, Siero, Uviéu y Mieres y qu’axunta a una montonera de cantadores.
La primera de les cites ye esti vienres 17 a les 20h nel Chigre La Maléfica de L’Infiestu. Esti llocal piloñés vien puxando dende la so apertura por programar tonada y, en collaboración con AICA (Asociación d’Intérpretes de Cancón Asturiana), entama esti día una actuación del cantador Manuel Arenas Pérez y el gaiteru Iván Tomás. Arenas emprimó la so andadura na canción asturiana presentándose a concursos como aficionáu nel añu 2014, siendo finalista en tolos concursos hasta que consiguió’l primer premiu como aficionáu en 2017 nel concursu de Samartín del Rei Aurelio y dempués llegando a toles finales como profesional. Tomás entamó como gaiteru nel añu 1992. Formó parte de la banda de gaites Noega Ribadesella, del grupu folk La Gueta la Runa y participó en varios festivales.
La segunda de les cites ye’l domingu 19 a les 11.30h nel Teatru Auditoriu de La Pola (Siero), onde se celebra la segunda final de la XIV edición del Concursu de Canción Asturiana Conceyu de Siero. Nella compiten Raúl Díaz García (Samartín del Rei Aurelio), Elena Granda Infiesta (Ribeseya), Aquilino Fernández González (Llangréu), Esteban Verdeja Martínez (Cantabria), Lorena Corripio López (Colunga), Carlos Velasco Montes (Bimenes), Alicia Villanueva Megido (Bimenes) y Isaac Sierra Longo (Parres). Na modalidá de canción dialogada compoten Alicia Villanueva y Carlos Velasco, na de canción vaqueira Néstor González y na categoría moza Néstor Díaz. El gaiteru oficial ye Valentín Fuente y la presentadora Esther Fonseca. La xornada va tar dedicada a la folclorista Ana Rosa Suárez Castro y destaca que, per primer vez nel concursu, va interpretase un cantar ensin microfonía.
El mesmu domingu a les 12h tien llugar la segunda eliminatoria del Concursu de Canción Asturiana «Ciudad de Oviedo», veteranu concursu d’asturianada que se celebra hasta’l 31 de mayu tolos domingos a les 12h nel Teatru Filarmónica d’Uviéu. Tien les siguientes modalidaes: gaiteros y gaiteres Solistes (Memorial “Remis Ovalle”); Canción Asturiana, voz masculina (Premiu “Manolo Delgado”); Canción Asturiana, voz femenina (Premiu “La Busdonga”); y Canción Asturiana, voz xuvenil (Premiu “Carlos Menéndez Jeannot”). Nesta xornada va tar como invitáu el monologuista Carlos Alba «Cellero».
Pa rematar, na Folixa na Primavera de Mieres hai el domingu a les doce y mediudía’l cancios de chigre con tonada y gaita ente les places de Requexu y Jerónimo Ibrán. Un calendariu qu’amuesa’l dinamismu de l’asturianada.
Semeya de Nay Semeya. Lucía Rojo na 1er Muestra d’Asturianada Electrónica.
Suscríbite a les nuestres novedaes
