El domingu pasáu entamó la XIV edición del Concursu de Canción Asturiana Conceyu de Siero, ún de los eventos institucionales más veteranos dedicaos a l’asturianada. Esti certame entamáu pol Ayuntamientu Siero, la so Fundación Municipal de Cultura y AFATRA (Asociación de Folclore Amigos de la Tradición) celébrase hasta’l 19 d’abril tolos domingos a les 11.30h nel Auditoriu CPI Llugones y nel Teatru Auditoriu de La Pola. El 10 de mayu va ser la gala de premios d’un concursu que ye clasificatoriu pal Premiu Nacional Obdulia Álvarez «La Busdonga» d’Asturianada.
Na segunda xornada d’esti certame, que va celebrase en Llugones, van participar un total de doce persones: Rogelio Mier Mier (Cabrales), Corsino Llaneza Conde (Llangréu), Carlos Mier Mier (Cabrales), Elena Granda Infiesta (Xixón), Daniel Pérez García (Piloña), José García García (Cangas del Narcea), Piedad García Guerra (Xixón), Ricardo Balmori Suero (Cabrales), César González Fernández (Somiedo), Aquilino Fernández González (Llangréu), Maribel Morán (Llaviana) y Jairo Pérez García (Piloña) na categoría moza. Amás, Elena Granda Infiesta participa tamién na modalidá de canción vaqueira.
El gaiteru oficial ye Valentín Fuente y la presentadora ye Esther Fonseca. La convocatoria d’esti añu caltién les categoríes absolutes masculina y femenina, amás de la categoría moza (hasta 22 años), y contempla premios especiales en canción vaqueira, dialogada y ayerana, trés estilos fundamentales del repertoriu tradicional asturianu.
Esta décimo cuarta edición llega con dellos cambeos significativos. Les modalidades de canción vaqueira, ayerana y dialogada van tar abiertes a toles persones participantes, independientemente de que tean inscrites nes categoríes absolutes o moza, anque van tener prioridá aquelles que sí lo tean.
Amás, los y les finalistes van tener qu’escoyer una de les trés pieces interpretaes na fase final pa cantala ensin microfonía, recuperando asina una esperiencia acústica más cercana a la tradición oral. Pa ello, la organización va instalar paneles acústicos (concha) nel auditoriu nes dos xornaes finales.
Tamién se repite la campaña “Venir a Siero tien premiu”, con sorteos en cada xornada como reconocencia a la fidelidá del públicu, una iniciativa que refuerza’l papel del concursu como espaciu de convivencia cultural.
Suscríbite a les nuestres novedaes
