Lucía Rojo ye una de les meyores voces xóvenes de la canción asturiana, escena a la que s’averó a los nueve años. Percorrió cuasi tolos concursos del xéneru ganando dalgunos premios nacionales na estaya xuvenil y minera. Nel IV Semando Fest, va amosar per segunda vegada l’espectáculu de tonada electrónica xunto a Fruela 757 y, a dos díes del eventu, falamos con ella.
Pa quien entá nun te conoz, ¿cómo cómo definiríes a Lucía Rojo en poques pallabres?
Lucía ye una persona natural, noble, de bon corazón, amable, sociable, empática, cercana, estrovertida y decidida.
¿Cómo entamasti nel mundu de la tonada?
Cuando yera más pequeñina, con 3 años, yá canté n’Avilés, y dempués, con un vecín de los mios güelos, cuando nos xuntábemos nel bar, cantábamos dalguna canción popular. Anque empecé na tonada con 9 años, porque al mio bisagüelu encántaba-y esti estilu musical.
«Los mios referentes son Obdulia La Busdonga, Xuacu el de Sama, Manuel Gandoy y Mari Celi Fernández»
Nesi sen, ¿qué referentes del xéneru tienes?
Los mios referentes son Obdulia La Busdonga, Xuacu el de Sama, Manuel Gandoy y Mari Celi Fernández.
¿Cómo naz esa tonada electrónica que vamos poder ver per segunda vez el 7 de febreru?
Esa tonada electrónica naz gracies a la propuesta que me fizo Xicu Ariza n’abril de 2025 pa crear un estilu musical nuevu, unificando la tonada —que ye un estilu más tradicional— cola música electrónica, que ye daqué más moderno.
«Cola mestura de dambos estilos queremos llegar a tol públicu pa que la esencia d’Asturies —que ye la tonada— nun desapaeza»
Vas actuar nel Semando Fest xunto a Fruela 757. ¿Qué pue esperar el públicu de l’actuación?
El públicu pue esperar de l’actuación ver la tonada dende otru puntu de vista más modernu, acercándola a un públicu de cualquier edá y tipu, yá que la tonada suel atraer a xente d’edá más avanzada, ente que la música electrónica la escucha xente más mozo. Cola mestura de dambos estilos queremos llegar a tol públicu y nun quedanos namás con una franxa d’edá, pa que la esencia d’Asturies —que ye la tonada— nun desapaeza.
Nun va ser namás que electrónica, tamién va haber tiempu pa la tonada más tradicional. ¿Cómo afrontes llevar a un espaciu como la Lata de Zinc una música más venceyada a los teatros?
Ye un retu llevar la tonada tradicional a un espaciu como esti, porque la xente que normalmente acueye la Lata de Zinc nun ta acostumbrada a escuchar esti estilu de música. Sicasí, tamién pue ser interesante p’abrir camín y que la tonada más tradicional pueda ser escuchada por más xente que normalmente nun-y pon muncha atención o nun-y acaba de gustar.
«Tenemos que lluchar por reivindicar la nuesa cultura y, d’esti mou, acercar los proyectos a la mocedá»
¿Qué tien d’especial tocar nun festival que sofita la cultura y, especialmente, la cultura fecha por xente mozo?
Pa mí ye mui importante participar nun festival d’estes característiques, porque tenemos que lluchar por reivindicar la nuesa cultura y, d’esti mou, acercar los proyectos a la mocedá, pa que nun se pierdan la nuesa esencia y les nueses raíces.
¿Qué significa pa ti formar parte del momentu actual de la música tradicional asturiana?
Toi arguyosa de siguir cola tradición de los nuesos antepasaos y de poder tresmitila a les nueves xeneraciones al traviés de la mio voz, col sofitu d’estos proyectos.
Pa quien tea dudando en dir a la vuestra actuación, ¿por qué nun tendría que perdelo?
Porque ye daqué novedoso qu’axunta dos estilos distintos y dispares nuna mezcla nueva que naide se pue perder y cola que se pretende averar la tonada a la mocedá, yá qu’esti estilu musical tien una afición bien avieyao, y ye mui importante acercar a la xente mozo a la tradición musical d’Asturies.
Semeya de Nay Semeya.
Suscríbite a les nuestres novedaes
