Yá acabó la Folixa na Primavera, pero esta gran festividá mierense que tien a la cultura de raigañu como protagonista sigue dando novedaes. El grupu folk-rock Skanda ta acabante d’asoleyar un videu del espectáculu que dieron el pasáu añu nesti eventu xunto cola Banda Gaites Villa Mieres y la Banda Sinfónica del Atenéu Musical de Mieres. Nél suena una de les pieces más icóniques de la formación, ‘Skanda‘, interpretada por 90 instrumentistes enriba l’escenariu.
«A veces la música sirve tamién pa midir el tiempu y esti añu, el tiempu trai una coincidencia perguapa: 30 años de la Folixa y 30 años de la Banda de Gaites Villa Mieres. Por eso queremos compartir esti pequeñu adelantu del conciertu de Skanda na Folixa del añu pasáu», publicó’l grupu nes sos redes sociales cuando al compartir el videu.
Dende Skanda valoraron que lo vivío na Folixa na Primavera 2025 «foi más qu’un conciertu: foi alcuentru, memoria y una manera de celebrar lo que somos y d’ónde venimos», y por eso llancen «un pequeñu fragmentu d’una nueche grande, d’eses nes que la música nun suena solo, sinón que recuerda y diz quién somos».
L’espectáculu que Skanda dio’l sábadu 5 d’abril del pasáu añu nel Parque Xovellanos de Mieres nun foi históricu namás por ser «un conciertu Made in Mieres con 90 persones nel escenariu interpretando temes clásicos de Skanda d’una manera qu’enxamás se sintieren enantes«, como declaró a Musicasturiana.com Pepe Fueyo, voz y guitarra del grupu; tamién lo foi porque supunxo la so vuelta a los escenarios dempués de diez años. La publicación d’esti videu ye un adelantu del conciertu completu que próximamente va ver la lluz. La obra audiovisual ta realizada por Baltico y ye una manera de poder sentir dende la pantalla la fuercia y la emoción de lo que Skanda, la Banda Gaites Villa Mieres y l’Atenéu Musical de Mieres fixeron a comuña.
Precisamente, un CD-DVD en directo, 18, foi lo último que llanzaron Skanda en 2015. L’álbum supunxo’l parón indefiníu d’ún de los nomes más destacaos del folk mestizu asturianu. Formaos en 1996 en Mieres, fueron quien a adaptar la música tradicional asturiana al so contestu industrial; asina ye como nes sos composiciones suena rock, funk o pop amestáu a unes lletres que nun pierden de vista la realidá social que los arrodia. Publicaron cinco discos d’estudiu, amás del directu pol 18 aniversariu; tuvieron delles nominaciones en premios musicales d’ámbitu estatal y asturianu; actuaron per milenta escenarios de dientro y fuera del país y son toa una referencia del folk fusión a nivel internacional.
Suscríbite a les nuestres novedaes
