Lorient ye una de les capitales de la cultura celta. Cada mes d’agostu la ciudá bretona tresfórmase pa acoyer a cientos de músicos y milenta visitantes qu’aporten dende países celtes estremaos. Pa los amantes de la música celta, el Festival Interceltique de Lorient ye lo que pa los uvieínos amantes de la ópera el Campoamor o pa los electrónicos Tomorrowland: un referente. Pa min, que tuvi la suerte de tar nel festival en varies ocasiones, ye un llugar nel que se vive la música y la cultura d’una manera que nun se pue desplicar.
La delegación asturiana formáronla cerca de 150 músicos y baillarines. Una ensame pequeñu si lo compares coles grandes potencies celtes (Escocia, Irlanda, Bretaña), pero qu’amosó qu’Asturies tien nivel pa tar al so altor. Ente ellos alcontrábense la banda de gaites La Reina’l Truébano de Navia, el grupu de baille San Félix de Candás, asina como los grupos folk Eva Tejedor & Les Pandereteres, Alienda, Guieldu y tamién solistes de prestixu reconocíu como Marisa Valle Roso, Rubén Bada, Pepín de Muñalén y Pablo Carrera.
Velos a toos ellos trabayar pa llevar el nome d’Asturies a lo más alto ye un arguyu. En cada escenariu al que xubíen sentíase l’alma asturiana. La respuesta del públicu, siempre cálida, fai que les hores de viaxe y ensayu pagasen la pena.
Nun ye lo mesmo vivir el FIL como participante que facelo dende la grada. Yo tuvi la oportunidá d’esfrutar de Les Horizons Celtiques dende’l prau del Stade Moustoir en 2024, pero esti añu tuvi’l placer d’esfrutalo dende les sos butaques y ensin la presión de salir a tocar. Foi dalgo emocionante ver a La Reina’l Truébano y a San Félix salir al estadiu y velos tastiar la esperiencia, anque con nervios enforma. Cinco actuaciones y cinco ovaciones.
La mesma emoción y ganes d’esfrutar sintiéronse nel desfile de La Grande Parade. El soníu de les gaites asturianes y panderetes sentiénse ente medies de bagad bretones y pipe bands escoceses, cola bandera d’Asturies abriendo’l desfile xunto al restu de naciones celtes. El públicu agrupáu en dambos llaos de les cais de Lorient y na grada del estadiu del F.C Lorient respondía con aplausos al pasu de la delegación asturiana.
L’actuación de la banda y del grupu nel Space Jean Pierre Pichard foi otru momentu nel que la representación asturiana rellumó. Primero, La Reina’l Truébano presentó melodíes estremaes tradicionales asturianes, pero tamién otres populares, como ‘La Romería’ de Víctor Manuel. Llueu, el grupu San Félix aprovechó la so actuación p’amosar bailles y dances asturianes a la par que se-y daba importancia a la variedá de traxes que vistíen.
Lorient tien requexos máxicos pa la música: Le Kleub, la Place des Pays Celtes o la Quai de la Bretagne. Ellí brillaron Marisa Valle Roso, que llevó la canción asturiana al festival y cautivó a un públicu bien atentu. Alienda esfrutó de la entrega y la calor del públicu en Le Kleub nel so primer conciertu. Eva Tejedor & Les Pandereteres fixeron que los asistentes baillasen al ritmu de la ‘Muñeira Carcarosa’, y Guieldu armó una folixa que terminó con tolos asistentes danzando al son de ‘Asturies danza na Celtia’.
Ver a grupos asturianos compartir escenariu con bandes internacionales como Talisk, Huartanes o Dominique Dupuis, ye un exemplu de que’l folk asturianu tien una voz propia y reconocida. Nun podemos escaecer l’espectáculu Celtic Odisee #4, qu’agotó toles entraes pa sentir a Rubén Bada y Pepín de Muñalén compartiendo escenariu con artistes como Xabier Díaz o Calum Steward.
Nel FIL tamién se dedica un espaciu a la enseñanza de los instrumentos propios de cada país celta, nel casu nuestru, la gaita. Nesta ocasión foi Pablo Carrera l’encargáu de poner la masterclass, xunto a los gaiteros gallegos Lucía Comesaña y Jose Manuel López ‘Josele’. Una oportunidá para da-y valir al nuestru instrumentu y a la rellación qu’existe ente les dos comunidaes.
El troféu MacCrimmon, que se celebra en Le Palais, volvió a ser un escaparate de calidá. Los cuatro gaiteros asturianos -Diego Lobo, Pelayo Suárez, Diego Fernández y Luis Enrique Sánchez- compitieron colos gaiteros gallegos -Rafael Carracedo, Manuel Seoane, Héctor Lomba e Ismael García-, qu’amosaron un gran nivel. El pódium quedó pa Carracedo, Suárez y Seoane, pero la sensación xeneral ye que la gaita asturiana tien presente y futuru.
El festival de Lorient ye muncho más que conciertos. Esta edición cuntó na esposición Euro Celtic Art col trabayu fotográficu El Vistir, qu’amosaba la riqueza de los traxes asturianos presentaos nel Día’l Traxe de Grau. Los visitantes destacaben la variedá y el coloríu de la nuestra indumentaria.
Una de les novedaes d’esta 54 edición foron les cenes-conciertu na Taverna Celte. La dedicada a Asturies foi un éxitu: fabada, frixuelos y arroz con lleche acompañaos pola música d’Eva Tejedor & Les Pandereteres y Alienda. Una velada que sirvió pa complementar la música asturiana cola nuestra gastronomía. A esta cena foi la Directora Xeneral d’Agricultura, Agroindustria y Desarrollo Rural, Begoña López, que destacó la importancia de la cultura y gastronomía en festivales d’esti calter, y por ello tornó pa casa col oxetivu d’ameyorar la imaxen que se presenta d’Asturies en Lorient.
Tar en Lorient nunca ye lo mesmo dos vegaes. Da igual que xubas al escenariu del Stade Moustoir cola gaita nel hombru o que te sientes na grada a esfrutar de la música. Siempre se torna pa casa con momentos únicos y con esperiencies que namás quien vive’l festival pue comprender.
«Lorient ye un espaciu nel que sentise parte d’una comunidá tovía más grande. Asturies, nesta ciudá, ye un país con voz propia, que gracies al esfuerciu de los grupos folk, les bandes y los grupos de baille, eleva’l nivel de la nuestra música y asegura’l futuru de la nuestra cultura»
Lorient ye, ensin dulda, un escaparate pa la música celta, pero tamién un espaciu nel que sentise parte d’una comunidá tovía más grande. Asturies, nesta ciudá, nun ye una convidada más: ye un país con voz propia, que gracies al esfuerciu de los grupos folk, les bandes y los grupos de baille, eleva’l nivel de la nuestra música y asegura’l futuru de la nuestra cultura. Cada nota que resuena en Lorient recuérdanos qu’Asturies nun ye namás presente: ye, sobre manera, futuru.
Semeyes de Francisco López Delgado, Delegación Asturiana del FIL y Festival Interceltique de Lorient.
Suscríbite a les nuestres novedaes
