Ente güei y el vienres la Universidad de Valladolid va acoyer el congresu académicu internacional Las tradiciones musicales y coreográficas. Procesos y proyecciones en el marco ibérico. La música asturiana va tar presente nél gracies a la participación en tres ponencies estremaes de Francisco López Delgado y Llorián García (dambos de la Universidá d’Uviéu), de Rodrigo Fernández Joglar (Conservatoriu Superior de Música del Principáu d’Asturies) y d’Ainhoa Muñoz Molano (Universidad Complutense de Madrid).
La representación asturiana entama esta mañana cola ponencia de Francisco López Delgado ‘Folclore en la calle’: El uso de la música tradicional para la promoción de la ciudad de Oviedo. Pela tarde tien llugar la entitulada Las ‘Xornaes del vigulín tradicional’: (re)construcción de una tradición olvidada, turismo cultural y paradigmas identitarios en torno al violín folk en Asturias que van dar Rodrigo Fernández Joglar y Ainhoa Muñoz Molano. Les dos ponencies tán dientro del bloque Música, turismo y medios audiovisuales.
La presencia asturiana remata’l xueves 26 dientro del bloque Música, patrimonio y espectacularización na que Llorián García Flórez va intervenir cola ponencia Problemas con la patrimonialización de la jota en Asturias: aportaciones metodológicas para lidiar con las ontologías múltiples del patrimonio inmaterial. D’esta manera, Asturies completa la so presencia esti congresu académicu internacional nel qu’otros territorios como Galicia, País Vascu, Andalucía, Portugal, Cuba o Cantabria tamién van tar representaos.
Suscríbite a les nuestres novedaes
