Entrando nel trimestre últimu, tres rematar setiembre, podría afirmase que l’añu 2025 foi unu bonu pal espoxigue de los grupos qu’apuesten por facer música n’asturianu. Bandes como Pvxarra o La Ciudá nel Mar, son dalgunos bonos exemplos d’ello. Sicasí, la trayectoria que se venía dando nesta dómina yera dalgo qu’esmolecía (y sigue esmoleciendo magar de los bonos datos collechaos), porque la creación de bandes de música o solistes que faigan los sos cantares n’asturianu ye, a cada vegada, más abegosa.
Son delles les razones a les que podemos atribuyir estos datos, que contribuyen amás a que la mayoría de les bandes que faen por cantar n’asturianu provoquen una xubida bultable na media d’edá de la escena n’Asturies. Una d’eses razones ye la falta d’una política llingüística de normalización verdadera, non solo na música, sinón en llinies xenerales, que normalice l’idioma. Cuando una llingua escarez d’una presencia normalizada na educación, nos medios de comunicación, na industria cultural y nos circuitos de difusión, tamién la música que se crea nella queda apostrada a la marxinalidá. Un grupu que decide cantar n’asturianu enfréntase al retu artísticu de componer y conectar col públicu como toos, pero tamién a una infraestructura precaria: poques radios qu’espublicen los sos cantares, escasos espacios de conciertos onde l’idioma seya bienllegáu ensin reserves, mínima cobertoria mediática y, munches vegaes, un mercáu amenorgáu por décades de desplazamientu llingüísticu. Nesi sen, munches vegaes el camín marcáu na elección d’idioma vien dende la infancia. Ye’l casu de Marina Pangua, vocalista de La Ciudá nel Mar, afirmando que, cuando entamó cola banda, foi lo natural cantar n’asturianu porque taba presente na so familia (so pá tocaba n’Ubiña y Xaréu Folk, mientres que l’hermanu facía lo propio en Felpeyu), pero tamién por convencimientu, porque «ye fundamental que la xente use les llingües propies y promuevan y difundan estes nel que-yos seya más propiu», concluye.
«Cuando una llingua escarez d’una presencia normalizada na educación, nos medios de comunicación, na industria cultural y nos circuitos de difusión, tamién la música que se crea nél queda apostrada a la marxinalidá»
Per otra parte, la banda Milana Bonita, que canten en castellán, tuvieron inclusive alderique ente ellos sobre si escoyer l’inglés pola aceptación a nivel social del idioma en detrimentu del propiu. Eso sí, agora apuesten tamién dacuando pol asturianu pa dar visibilidá, nun averamientu que tán considerando como una aventura. Col so cantar ‘Dardu’ tuvieron tan bona acoyida que la so idea ye sacar más temes nesti idioma. Pal cantante Mardom, la disglosia tuvo muncho que ver, porque’l so desenvolvimientu foi de manera mayoritaria en castellán y porque nun pudo formase académicamente n’asturianu como si asocede n’otres comunidaes con más d’un idioma oficial. Sicasí, l’artista tien en mente producir cantares n’asturianu nun futuru cercanu con lletres que yá tán escrites.
Otra manera, la falta de referentes na música ye una razón clave pa la falta d’artistes qu’apuesten pol asturianu na so música. Anguaño, la mocedá escueye xéneros musicales que nun esisten n’asturianu o, si esisten, ye de manera testimonial, con namás una o dos bandes que los representen. Son la electrónica, el hardcore, el rap o’l reggaeton, ente otros. Por embargu, si vamos a llugares vecinos onde l’usu d’una llingua minorizada ye oficial (anque l’usu amenorga de manera esmolecedora na xente mozo), la situación ye diferente dafechu parándonos, por exemplu, na música electrónica.
«Anguaño, la mocedá escueye xéneros musicales que nun esisten n’asturianu o, si esisten, ye de manera testimonial, con namás una o dos bandes que los representen»
En Galiza, artistes como Ortiga, Verto, Boyanka Kostova o Mondra entemecen esti xéneru tan nuevu colos soníos más tradicionales, afitando una escena nomada por munchos como flow costumbrista de pueblu, twerking rural y que vienen a ser los pioneros del trap fechu en gallegu. Mención aparte merez Galician Army, dúu electrónicu al qu’inclusive Billboard dedicó dellos artículos, que produxo temes pa Fillas de Cassandra y con una presencia afitada dafechu na escena de Djs. Precisamente esti últimu grupu, formáu por dos moces neofalantes, ha tenese como exemplu. Sara Faro y María SOA, naturales de Vigo, apostaron por facer música en gallegu siendo yá la so llingua principal, anque non la de nacencia, y afirmen que nos sos conciertos tán viendo l’usu d’esta llingua y présta-yos pensar qu’eso llueu s’estrapola a les sos vides cotidianes y l’idioma llega a tolos llugares. De xuru que tamién se traduz nuna mocedá que s’anima a falar y crear música nesta llingua por mor de la visibilidá que-y da la escena gallega actual. Crear en gallegu, dicen, ye «falar de la so hestoria y construyir identidá». Sicasí, tamién nun idioma en meyor situación que l’asturianu, estes artistes concluyen que fai falta que’l trabayu seya conocíu y reconocíu fuera de los propios circuitos.
Pero non too son datos negativos y asina lo reflexa Marina, argumentando que n’Asturies, magar de lo pequeño del territoriu, hai una bayura importante de músicos y músiques d’estilos variaos, non teniendo qu’esmolecenos por ello. Tamién va na mesma dirección el pensamientu de la banda Milana Bonita, que destaca que los referenes qu’hai son mui fuertes, con nomes como Rodrigo Cuevas o Ferla Megía o Pablo Senator, que «con Desakato yá cantaba a plenu pulmón cantares n’asturianu col Wizink enllenu».
A la falta d’unes polítiques llingüístiques de normalización verdaderes y la falta de referentes na mocedá ha sumase, tamién, la cultura de la inmediatez que vive la sociedá de consumu na que vivimos. Consúmese d’una manera tan rápida y onde manda la inmediatez que los formatos tradicionales de consumu de la música tán esborriándose. La espublización íntegra de discos ta desapaeciendo mientres la tendencia d’asoleyar singles ye la que s’impón y, de la mesma, la cantidá de conteníu consumíu choca cola capacidá de reflexón. La voráxine de conteníos a los que s’enfrenta anguaño la mocedá provoca que nun se valoren les creaciones musicales nueves y, sí se faen, ye al traviés de les tendencies que se creen nes redes sociales y medios de comunicación, onde les llingües minorizaes nun tienen espaciu por nun tar afeches a les necesidaes tecnolóxiques de l’actualidá.
«Consúmese d’una manera tan rápida y onde manda la inmediatez que los formatos tradicionales de consumu de la música tán desapaeciendo»
Munches vegaes, l’atractivu ta nel xestu de cantar “na llingua distinta”, nel valor simbólicu más que na comprensión real del mensaxe. La llingua vuélvese un traza sonora que se diferencia y llama l’atención, pero cuerre’l riesgu de ser consumida como un interés exóticu dientro del fluxu interminable de novedaes. Amás, l’algoritmu premia lo que se viraliza en pocu tiempu, lo que lleva a los artistes a afaese a formatos curtios o a entemecer la llingua propia cola dominante p’algamar mayor alcance. Asina, lo que se gana en visibilidá puede perdese en profundidá y la música cuerre’l peligru de reforzar una imaxe estereotipada, onde la llingua apaez como adornu y non como un sistema vivu y completu.
Pueden contase les escepciones que confirmen esta regla de la cultura de la inmediatez. Una d’elles ye l’artista euskaldun Aimarz que, col cantar ‘Entzun dezatela’, se fixo viral na plataforma TikTok, con miles de likes y millones de reproducciones. Esi cantar inspiró a muncha xente mozo a emplegar l’euskera o a deprendelo (inclusive fuera de les fronteres d’Euskal Herria col envís de deprender los significaos d’estos cantares).
D’esta manera, axuntando toes estes premises, los y les artistes reclamen el sofitu pa un correctu desenvolvimientu de la trayectoria. Dende La Ciudá nel Mar apuesten por sitios afayadizos onde poder tocar con tola potencialidá, mesmo qu’una rede de conciertos en toa Asturies y en diálogu con otros llugares, cola fin de potenciar que la xente conoza la música que se fai equí. Pa Mardom, la cuestión económica ye lo principal: cuesta muncho producir música con calidá y per ehí han venir los sofitos.
«Ensin un cambéu estructural, el futuru del cantar n’asturianu va siguir dependiendo más del esfuerciu individual que d’una política cultural sólida. Y eso, a la llarga, marca la diferencia ente una tradición y una cultura viva y una simple anécdota»
La música n’asturianu nun ta en peligru d’estinción, pero sí d’invisibilidá. Les nueves bandes y solistes que tán apostando pola llingua —dende los escenarios pequeños hasta los festivales— demuestren que l’idioma tien una capacidá enorme pa camudar, entemecese y afacese a los tiempos, pero ensin un cambéu estructural que garantice espacios de creación, visibilidá mediática y formación académica na llingua, el futuru del cantar n’asturianu va siguir dependiendo más del esfuerciu individual que d’una política cultural sólida. Y eso, a la llarga, marca la diferencia ente una tradición y una cultura viva y una simple anécdota.
Suscríbite a les nuestres novedaes
