El Plenu de la Xunta Xeneral d’esti xueves 28 de mayu aprobaba colos votos a favor de tolos grupos parllamentarios, sacante Vox que s’abstuvo, la reforma de la Llei de Cooperatives d’Asturies. Ente les cuestiones qu’actualicen esta norma vixente hai años (2010), pero qu’agora tien una redacción nueva, rescampla una que tien que ver col mundu cultural y creativu.
Trátase de la inclusión ente les clases de cooperatives d’aquelles de calter cultural y creativu, añadiéndose una tipoloxía nueva con un artículu específicu. Asina, el númberu 161, establez que van tener la consideración como tales aquelles que tengan como oxetu social la creación, producción, distribución, exhibición, o espardimientu de bienes y servicios culturales o creativos; quedando incluyíes nel ámbitu d’aplicación d’esta llei, ente otres, aquelles actividaes rellacionaes cola música. Otra manera, nel puntu 4 d’esti mesmu artículu estipúlase que l’Alministración va impulsar programes d’apoyu pa les cooperatives que desenvuelvan proyectos culturales, educativos o editoriales venceyaos a la cultura y al asturianu o gallego-asturianu, pudiendo entamar midíes específiques pal fomentu d’esti tipu de cooperatives.
Les industries culturales y creatives constitúin un sector estratéxicu pa la diversificación económica, la innovación y la proyección cultural d’Asturies. Sicasí, tienen niveles de precariedá llaboral altos y una fragmentación empresarial. El modelu cooperativu puede ser una ferramienta afechisca pa organizar el trabayu cultural, favorecer la profesionalización del sector y fortalecer el texíu creativu. Cola aprobación d’esta norma, Asturies conviértese na primer Comunidá Autónoma del Estáu en reconocer por llei les cooperatives d’industries culturales y creatives, colo que l’asitia na vanguardia nesti campu.
Suscríbite a les nuestres novedaes
