Semar pa que xorreza. Esti ye ún de los eslóganes qu’usó pa tresmitir la so filosofía el Semando Fest, festival de música moza n’asturianu creáu por MUSICASTURIANA.COM. Dempués de trés ediciones celebraes d’esi eventu y llueu de 8 años de qu’esti espaciu dixital dedicáu a la escena’l país entamara a dar los sos primeros pasos, pue dicise que la música n’asturianu ta viviendo ún de los sos momentos más dinámicos y orixinales d’esti tiempu; y la mocedá ta xugando un papel clave dientro d’ello.
«8 años dempués de qu’esti espaciu dixital dedicáu a la escena’l país entamara a dar los sos primeros pasos, pue dicise que la música n’asturianu ta viviendo ún de los sos momentos más dinámicos y orixinales d’esti tiempu»
Namás hai que sentir la playlist Novedaes Música Asturiana pa decatase d’esto. Los quince primeros temes publicáronse esti branu; daqué qu’amuesa’l bon ritmu de llanzamientos que ta habiendo y l’aumentu de la presencia d’ellos en plataformes dixitales. En 2017, enantes de qu’existiera MUSICASTURIANA.COM y trabayara pa poder esparder la nuestra música per tol mundu, la presencia en Spotify de cantares n’asturianu yera testimonial.
«En 2017, enantes de qu’existiera MUSICASTURIANA.COM y trabayara pa poder esparder la nuestra música per tol mundu, la presencia en Spotify de cantares n’asturianu yera testimonial»
A esto hai que sumar esa pluralidá y espoxigue yá mentaos: pue sentise electrónica-hardcore con PVXARRA; canción d’autor esperimental con Tania Pereira; la propuesta renovadora de La Ciudá nel Mar qu’entemez indie, folk y canción d’autor; punk con Ochobre y Asturtralla; Vero Rubio y la so propuesta instrumental cercana a la música clásica; esi hit de power folk d’Alienda qu’amás pon banda sonora al FIG; el folk fechu en L.laciana de D’Urria qu’enacha llazos ente los territorios falantes d’asturlleonés d’un llau y otru del cordal; o sentir a una banda de gaites como Llacín trabayando con sonoridaes distintes a les que s’asocien tradicionalmente a esti instrumentu.
Amás ye de destacar que cada vez más grupos que canten en castellanu s’animen a facer les sos primeres composiciones n’asturianu. Dalgunos exemplos recientes son l’aragonesa Isabel Marco collaborando con Mala Reputación, Milana Bonita o Sartenazo Cerebral. Y tamién al revés: proyectos nos que la llingua asturiana tuvo enantes mayor presencia –Marisa Valle Roso y Sólo (Alfredo González)-, tovía caltienen dalgún tema n’asturianu ente’l so repertoriu.
Pa rematar esti averamientu a la situación actual de la escena sorrayamos el papel que ta xugando la mocedá nesti ámbitu. Nesti añu anunciamos el nacimientu de dellos proyectos formaos por componentes menores de 35 años –Rellume, Entós, La Ciudá nel Mar, PVXARRA– qu’afiten el futuru de la escena y que se sumen a los otros nomes mozos y veteranos que-y ponen ritmu a esti país y a esti idioma.
«Hai evidencies de qu’esti son xorrez y fueron dándose pasinos con munches de les reivindicaciones del sector, pero siguimos tando mui lloñe d’otres realidaes de la nuestra redolada»
Too esto da razones pal optimismu. Como tamién ye de celebrar la montonera d’eventos qu’hai nos que suena la música n’asturianu o que na radio y televisión pública vuelva haber programes nos qu’esta escena tien una presencia digna. Dende 2017 pa equí hai evidencies qu’amuesen qu’esti son xorrez y fueron dándose pasinos con munches de les reivindicaciones del sector.
«El númberu d’oyentes en Spotify, la cantidá de grupos que surden de mui estremaos estilos, la profesionalización del sector, el presupuestu de los cachés, el grau de conocimientu ente la sociedá, les ventes de discos, el tamañu de les xires o la presencia na programación festiva llocal; son dalgunos indicadores nos qu’hai que reparar»
Sicasí, nun hai que cayer na complacencia y ye necesario siguir avanzando pa que la música n’asturianu tea al mesmo altor qu’otres escenes en llingües minorizaes de la nuestra redolada porque, pesie a resistir, siguimos tando mui lloñe d’otres realidaes que lleven más de 40 años desendolcando polítiques llingüístiques y musicales afayadices. El númberu d’oyentes en Spotify, la cantidá de grupos que surden de mui estremaos estilos, la profesionalización del sector, el presupuestu de los cachés, el grau de conocimientu ente la sociedá, les ventes de discos, el tamañu de les xires o la presencia na programación festiva llocal; son dalgunos indicadores nos qu’hai que reparar y polos que trabayar pa qu’esti son siga xorreciendo con dignidá.
Semeya del III Semando Fest, fecha por Nay Semeya.
Suscríbite a les nuestres novedaes
