Bandina L’Arrancaera publica ‘Picu y pala’
L’agrupación Bandina L’Arrancaera ta acabante de publicar un discu de títulu Picu y pala conteniendo once cortes, ente ellos bien de pieces tradicionales como «Son d’Arriba», «Muiñeira de Grandas», «Xota Caldueñu», «Muliñeires de Clemente» o «Xiraldilla de Malveo», amás de dos composiciones propies del gaiteru y acordionista Javier Tejedor: «Pasucáis de L’Arrancaera» y «Vals del 7u día». Precisamente’l músicu avilesín ye’l profesor de los componentes d’esta bandina, toos ellos alumnos del Aula de Música Tradicional de la Escuela de Música de Mieres.
Once son tamién los integrantes d’esta especie d’orquestina de música tradicional asturiana, que toquen instrumentos como l’acordión diatónica, la pandereta, el panderu, el tambor, el bombu o’l saxu, amás de cantar en delles pieces. Con una media d’edá mui xoven y dirixíos por Javi Tejedor esti discu ye una muestra de música tradicional del país de distintes zones xeográfiques, con un soníu mui apegáu a los sones orixinales. La presentación del trabayu facíenla nes pasaes fiestes de San Xuan en Mieres y ye’l frutu del llabor desendolcáu a lo llargo del cursu.
Picu y pala ye l’exemplu apalpable de cómo les escueles y aules de música tradicional son ferramientes amañoses pal so caltenimientu y esparden el gustu ente la mocedá por estos soníos, facilitando la tresmisión interxeneracional y apostando pol futuru.
Calca na imaxen pa ver un videu de la Bandina L’Arrancaera
