La banda gaites Camín de Fierro estrena’l so discu nuevu con un conciertu en Proaza
En xunetu de 2021 la Banda Gaites Camín de Fierro asoleyaba’l so segundu discu Rock & Fierro. Tres pasar l’andanciu, esta banda de los conceyos de Santo Adriano, Proaza y Teberga va poder estrenalu en directo. La cita va ser el 9 de xunetu a les 22.30h nel Polideportivu de Proaza y nella van sentise los cantares que formen esti orixinal trabayu qu’amesta gaita y rock y que tien les collaboraciones d’artistes como Jorge Otero, Pablo Moro, Toli Morilla o Xune Elipe.
El director de la Banda, Balbino Menéndez, presentó’l conciertu en rueda prensa nel Ayuntamientu de Proaza en compañía de la conceyala de Cultura, Nerea Díaz, y la presidenta de l’asociación d’hostelería Asturproc, Laura Panera. La conceyala refirióse al eventu como «el conciertu del branu», convirtiéndose nuna apuesta del Conceyu pola cultura llocal y poles señes d’identidá propies. L’oxetivu, desplicó, ye atraer a xente de fuera a ver el conciertu, pero tamién axuntar a los vecinos de la redolada pa qu’esfruten con un productu autóctonu y auténticu. Na mesma llinia, la presidenta de los hosteleros animó a dir el 9 de xunetu a Proaza y comentó que dende Asturproc van poner a disposición paquetes d’estancies específiques pal eventu. «Hai poques places y vamos petalo, asina que si dalguien ta pensándoselo, qu’entaíne», dixo.
Balbino Menéndez añadió que, más que’l conciertu del branu, pa la Banda Gaites Camín de Fierro «ye’l conciertu d’un llustru», por mor del trabayu y l’esfuerzu económicu de dellos años hasta llegar a estrenar la obra enriba d’un escenariu. «Gracies al Ayuntamientu de Proaza por danos la oportunidá. El conciertu significa la materialización de toa una inversión de tiempu, esfuerzu y economía», declaró na presentación del eventu musical. En cuantes a la parte técnica esclarió qu’entemecer rock con una banda gaites «tien unes complexidaes técniques importantes», pero qu’algamaron una «fusión real» na que cadún de los estilos tien la so identidá y protagonismu.
Emisión per Internet
El polideportivu de Proaza va acoyer esti eventu a les 22.30h del 9 de xunetu. El conciertu va tener 20 músicos enriba l’escenariu, va emitise per streaming y cunta cola financiación pública del Conceyu de Proaza y de la Conseyería de Cultura a traviés del programa Asturies Cultura en Rede.
