A finales de 1989 Beleño dieron el so últimu conciertu nel Teatru Prendes de Candás. Con él, poníen un puntu a una trayectoria que los llevó a ser una de les formaciones pioneres del folk celta asturianu y a publicar dos discos de cultu: Na ca’l fuau (1985) y Ofiusa (1987). Más de tres décades dempués esi puntu marcáu conviértese nun puntu siguíu y el grupu anuncia casique por sorpresa el so regresu: yá ta a la venta’l so tercer discu, Daón, y va poder volver a vese a Beleño enriba d’un escenariu.
«Les razones pa volver son tres: la primera ye que cuando lo dexamos quedara una maqueta grabada con temes que quedaron en puntu muertu y pensamos que con una puesta al día podíen interesar. La segunda ye que l’amistá ente la xente del grupu nunca se perdió y siguimos en contacto. Y la tercera ye porque sigue interesándonos la música del país como al principiu y tamos al día de tolo que ta pasando musicalmente», desplica Xuan Prado, gaiteru y flautista de la formación. Él y otru de los miembros orixinales de Beleño, Frankie Delgado (vigulín, bouzuki y bodhran); xunto a quien yá tocara «na segunda época del grupu», Gonzalo Peláez (samplers, programaciones, arpa céltica y zanfona); cola incorporación d’Amparo García a la voz y l’andecha de Borja Baragaño cola uilleann pipes; firmen los diez temes qu’asoleyen agora en formatu CD.
Daón ta formáu «polo que quedó iniciao n’Ofiusa», comenta Prado quien matiza que «había una serie de temes qu’apuntaben a un cambiu nel estilu musical del grupu y esti discu lo confirma». D’esta manera hai siete cantares qu’amesten lletres tradicionales con otres de nueva creación escrites polos poetes asturianos Ignaciu Llope, Teresa Lorences y Xosé Miguel Suárez -qu’escribe un cantar en gallego-asturianu-. Hai romances, «una especie d’introito qu’inclúi una grabación antigua d’un discu de pizarra», l’instrumental «Daón» que da nome al discu y versiones de tres pieces icóniques d’aquel folk de los años 80: una reinterpretación de «Montesinos» (del discu Ofiusa), otra de «Na ca’l fuau» (el cantar del fináu Fernando Largo que nomaba al primer álbum de la formación) y una versión de les «Muñeires de Bual» que grabara Trasgu en La Isla de Hélice en 1983; discu pioneru del folk celta asturianu.
Complexidá y conciertos
«Los temes d’esti discu son realmente complicaos de llevar al directo; necesites prácticamente una orquesta completa y ye una producción musical mui complexa y costosa», camienta Xuan Prado. Precisamente a esta complexidá fai referencia’l llibretu del álbum -diseñáu por Ástur Paredes, como’l de los sos otros dos trabayos-, que rescampla «l’enfotu por buscar un soníu lo más xenuinu posible, basáu na tonalidá pero tamién nos modos antiguos», lo que da como resultáu «un soniu distintu, perpoco esploráu na música folk asturiana, magar que bien abegoso de reproducir en directo».
Sicasí, el gaiteru y flautista respuede que «dalgunu sí qu’habrá» a la entruga de si Beleño van volver a dar conciertos. «Nun sé cuantos, pero lo que pue haber ye una formación que toque dalgún tema d’esti discu, dalgún d’Ofiusa y sobre too temes de Na Ca’l Fuau». A la fin, cuasi 40 años dempués del so debú discográficu, Xuan Prado y Frankie Delgado tovía tienen «ilusión y muncha gana», nagüen por que preste esti discu grabáu ente la casa del propiu Prado y Granada -onde reside la vocalista Amparo García, una asturiana emigrada- y como bien dicen «habrá xente que tovía s’alcuerde de Beleño». Daón yá ta equí p’amosalo.
Suscríbite a les nuestres novedaes
