Güei entama la 27 edición del festival Música Antigua Xixón. El Centru de Cultura Antiguu Institutu va acoyer ente’l 1 y el 7 de xunetu dellos conciertos, talleres, conferencies y otres actividaes. Héctor Braga participa nel conciertu d’apertura Canteros del sonido: entre cuernos y cuernas acompañáu de la Orquesta de Cámara de Siero con Manuel Paz a la direición y el músicu gallegu Abraham Cupeiro. L’eventu ye güei a les 20h nel patiu del CCAI y les entraes pueden mercase por 3€ na taquilla a partir de les 17h.
Canteros del Sonido recupera pa esti conciertu dos instrumentos medievales -rota y corna- recreaos a partir de la iconografía de los templos románicos d’Arlós y Ciares. El programa inclúi composiciones d’Héctor Braga y Abraham Cupeiro, una obertura d’estrenu de Flores Chaviano basada en melodíes de les Cantigues d’Alfonso X «el Sabiu» y dos pieces de Béla Bartók y Astor Piazzolla.
Per otru llau, el Muséu del Parque Arqueolóxicu-Natural de la Campa Torres acueye hasta’l 29 de setiembre una esposición col mesmu nome frutu del estudiu y reconstrucción de seis instrumentos d’ente los sieglos XII y XIV de la iconografía de delles ilesies asturianes de Ciares, La Lloraza, Arlós, Uxo y Gozón. El programa completu pue vese equí.
Suscríbite a les nuestres novedaes
