«Nel Llar Trad Fest vamos tener alredor de 250 músicos y baillarinos de tol mundu aconceyaos en Somiedo»

La Pola Somiedo va acoyer del 28 de xunu al 1 de xunetu de 2024 la primer edición del Llar Trad Fest, un festival que promete ser una esperiencia tresformadora pa los amantes de la música folk y tradicional nun espaciu únicu como ye’l conceyu de Somiedo. Pa conocer más d’esti proyectu, falamos con Bree Delian, directora del eventu.

A finales de 2023 presentóse públicamente el proyecto Llar desenvolviendo les primeres actividaes. ¿En qué consiste esta iniciativa y por qué ñaz?

Llar ye una asociación cultural ensin porgüeyu económicu fundada en 2023, dedicada a fomentar una fonda apreciación de les músiques tradicionales asturianes y del Arcu Atlánticu al traviés del intercambiu intercultural, la creación de comunidá y la tresferencia interxeneracional de conocimientos. Ñació pola necesidá d’afrontar los retos a los que s’enfrenten les tradiciones culturales asturianes, como por casu l’amenorgamientu de compromisu de la mocedá, la despoblación del territoriu y la desigualdá de xéneros. La iniciativa busca remocicar y promover el bayurosu heriedu cultural d’Asturies, usando los raigaños culturales como impulsor de los cambeos sociales y del desenvolvimientu cultural caltenible.

«Hai delles instituciones que van usar Llar como casu d’estudiu sobre la revitalización cultural, l’activación económica y el desenvolvimientu caltenible de zones rurales remotes al traviés de la promoción d’actividaes de turismu cultural y creativu»

Llar ñaz con una filosofía de trabayu a comuña de la que tu yes una de les cares visibles, pero hai más xente implicao nel proyectu. ¿Quiénes participen d’esta iniciativa? 

Llar Folk entamó como un grupu de reflexón en 2023 y medró de manera bultable dende entós. Nesta dómina, fuimos principalmente Rodrigo Joglar y yo mesma, pero tamién nos echaron un gabitu un maraviyosu grupu de voluntarios y voluntaries d’Asturies y de fuera d’ella. 

Ente los miembros clave atópome yo, Bree Delian, fundadora d’ARC, esperta en xestión de proyectos ya iniciatives culturales; Rodrigo Joglar, especialista n’intervención social y educativa; Anna-Wendy Stevenson, renomada vigulinista y profesora titular; Noemi Nemes, esperta en práctiques rexeneratives de la tierra; Simon Bradley, líder del programa y fundador del intercambiu cultural; y Michael Walsh, que ta realizando’l so doctoráu sobre la interpretación de la xiblata na escena folclórica asturiana.

Llar une a músicos, profesores, artistes y estudiantes de tol mundu. Ente los participantes más destacaos tán notables educadores como Michael McGoldrick, Jean Michel Veillon, Anxo Lorenzo, Liz Doherty y munchos otros de países como’l Reinu Xuníu, Irlanda, Bretaña, Escocia y Galiza. La iniciativa tamién collabora con artistes llocales asturianos como Pepín de Muñalén, Lisardo Prieto, Xosé «Ambás», Ramsés Ilesies, María Vázquez y Pau Santirso, garantizando un profesoráu diversu ya intercultural.

Tamién tamos en conversaciones con instituciones como la Fundación Caja Rural, Show Me Your Roots (Irlanda), Aoife Granville (Universidá de Cork), Laboral (Asturies) y la Universidá d’Uviéu, que van usar Llar como casu d’estudiu sobre la revitalización cultural, l’activación económica y el desenvolvimientu caltenible de zones rurales remotes al traviés de la promoción d’actividaes de turismu cultural y creativu.

«El Llar Trad Fest ñació pa frayar les barreres culturales y xeneracionales, promoviendo la tresmisión oral de la música tradicional y conectando les diverses tradiciones musicales del Arcu Atlánticu»

A finales d’esti mes afrontáis el vuesu proyectu más ambiciosu, el Llar Trad Fest. ¿Cómo surde Llar Trad Fest y con qué oxetivos?

Depués d’un añu de planificación y collaboración, reconocimos la necesidá d’actuar p’afrontar el compromisu de los mozos y moces y la construcción de la comunidá. El Llar Trad Fest ñació pa frayar les barreres culturales y xeneracionales, promoviendo la tresmisión oral de la música tradicional y conectando les diverses tradiciones musicales del Arcu Atlánticu. Los nuesos oxetivos son educar, inspirar y fomentar una apreciación más fonda de la música tradicional y folclórica por aciu clases maxistrales, actuaciones y actividaes comuñales.

Tamos fondamente encantaos y sorprendíos pola respuesta, sobre manera porque nun tuvimos financiamientu nin presupuestu. Fíxose too por aciu marketing orgánicu y col boca a boca. La selmana que vien vamos recibir a más de 200 estudiantes de tol mundu, de llugares como Nueva York, Xeorxa, Irlanda, Escocia, Reinu Xuníu, Francia y de toa España. Con más de 30 profesores, vamos tener alredor de 250 músicos y baillarinos aconceyaos nun pueblín d’Asturies: ¡imaxina la maxa que vamos crear!

Esto nin siquier incluye los conciertos. Tenemos cuatro nueches de conciertos íntimos nos que van actuar dalgunos de los nuesos increíbles profesores de tol mundu, como Michael McGoldrick, Jean-Michel Veillon, Felpeyu, Herbamora, Anna-Wendy Stevenson y Fin Moore d’Escocia, por nomar namás a dalgunos. ¡L’entusiasmu y la enerxía van ser fenomenales!

La tresferencia de conocencies ye tamién un aspectu esencial de la nuesa misión. Pretendemos construyir una comunidá fuerte que llegue a audiencies internacionales, convidando a persones de tol mundu a deprender y apreciar la guapura de la música, el cantar y la danza asturianos. Al xunir a músicos, profesores, artistes y estudiantes de tol mundu, el Llar Trad Fest aspira a crear un vibrante intercambiu cultural, promoviendo práctiques culturales caltenibles y revitalizando les zones rurales. Tamién sirve de plataforma non solo pa caltener, sinón tamién pa celebrar y compartir el patrimoniu asturianu nun escenariu global, fomentando la comprensión internacional y l’apreciu poles nueses bayuroses tradiciones culturales.

Escoyéis Somiedo como ubicación, descentralizando asina l’actividá cultural de los grandes núcleos poblacionales. ¿Por qué?

Buscar una llocalización foi unu de los nuesos mayores retos. Queríemos un espaciu rural con una contorna guapa y con agospiu p’alredor de 300 persones. Al traviés de dellos aconceyamientos, conocimos a Mino, l’alcalde de Somiedo. Magar de que nun pudiera sofitanos de manera financiera, ayudáronnos enforma cola infraestructura, servicios y asegurándose de que l’eventu pudiera celebrase. Somiedo ufierta l’escenariu perfectu pal Llar Trad Fest.

A lo cabero, escoyóse Somiedo como see del festival p’alloñalu de les grandes ciudaes y poner l’atención sobre les zones rurales riques en patrimoniu cultural. Esta elección sorraya’l compromisu de Llar cola revitalización de les comunidaes rurales, la promoción del arguyu local y la puesta en valor de los paisaxes culturales y naturales únicos d’Asturies.

« La selmana que vien vamos recibir a más de 200 estudiantes de tol mundu, de llugares como Nueva York, Xeorxa, Irlanda, Escocia, Reinu Xuníu, Francia y de toa España.»

¿Cómo pueden aportar a estes actividaes les persones interesaes en participar?

Los participantes pueden aportar a Somiedo viaxando a Asturies, accesible por vuelos al Aeropuertu d’Asturies, trenes y autobuses. Dende los principales núcleos de población van entamase opciones de tresporte llocal pa facilitar l’accesu al espaciu del festival.

Tamos asociándonos con Guppy pa entamar recoyíes y tresllaos pa les persones que lleguen a los aeropuertos de Bilbo, Santander, Santiago de Compostela, y les que lleguen al aeropuertu d’Asturies o a la estación d’autobuses d’Uviéu. Como celebramos el festival nuna zona que ye una biosfera natural, queremos contribuyir na midida de lo posible a la salú de la zona. La nuesa asociación con Guppy reflexa’l nuesu compromisu cola sostenibilidá y l’impactu social. Al escoyer un tresporte ecolóxicu, podemos amenorgar colectivamente la nuesa buelga de carbonu y dar exemplu a futuros festivales. Xuntos, podemos garantizar que’l Llar Trad Fest seya una celebración del patrimoniu cultural y un pasu a un futuru más caltenible.

«Asturies ye la única nación celta del mundu que nun esperimentó una gran renacencia. Averanos a músicos, académicos ya instituciones d’estes naciones ayúdanos a deprender y entender»

30 profesores de seis países onde podemos alcontrar nomes como Xisco Feijoó, Liz Doherty, Fin Moore o Michael McGoldrick, ente otros. ¿Qué puede aportar esti profesoráu intercultural?

Esti diversu profesoráu apurre una gran esperiencia y talentu artísticu, ufiertando una oportunidá única pal intercambiu cultural y el deprendizaxe. Los sos variaos oríxenes y especialidaes arriquecen l’axenda del festival, fomentando una comprensión y apreciación más fondes de les distintes tradiciones musicales y promoviendo la collaboración intercultural.

Asturies ye la única nación celta del mundu que nun esperimentó una gran renacencia. Averanos a músicos, académicos ya instituciones d’estes naciones ayúdanos a deprender y entender. Los profesores pueden compartir munches técniques musicales, pero tamién deprendemos sobre les nueses diferencies y lo que nos fai únicos. Al acoyer a profesores cualificaos del otru llau del Arcu Atlánticu, establecemos un puntu de referencia alzáu nel que non solo deprendemos, sinón que tamién enseñamos. D’esta tresferencia de conocencies trata Llar.

Estos profesores nun vienen namás a enseñar música, sinón que munchos tamién participen en meses redondes, como «Rexeneración y cultura», «Cómo afecta’l mediu ambiente a la música» y «Renacencies celtes en tol mundu», nes que los participantes falen de lo que funcionó n’otres naciones, ufiertando pervalibles conseyos sobre cómo Asturies puede deprender col exemplu. Michael Walsh va ufiertar una charra basada na so investigación doctoral sobre l’estilu folclóricu asturianu de xiblata.

Precisamente, l’interceltismu ye una de les señes d’identidá del proyectu. ¿Cómo se ta recibiendo la iniciativa ente músicos de fuera d’Asturies? ¿Y ente’l sector de la música tradicional asturiana? 

La iniciativa tuvo una gran acoyida ente los músicos de fuera d’Asturies mesmo que nos de dientro del sector de la música tradicional asturiana. Los músicos internacionales aprecien la plataforma pal intercambiu cultural y el deprendizaxe. Munchos músicos d’altu nivel de tol mundu tán encantaos de deprender música asturiana. Punxéronse en contactu conmigo ente 50 y 80 músicos internacionales de llugares tan alloñaos como Xapón y Australia, que nun pudieron venir esti añu pero tán interesaos en venir l’añu que vien.

N’Asturies, fiximos un ampliu llabor de divulgación en toles escueles de música y centros d’enseñanza primaria, mesmo qu’en Galiza y Cantabria. Convidamos a estes escueles a collaborar y promover el proyectu ente los sos alumnos, ufiertando clases de nivel profesional pa profesores, músicos y alumnos. Lamentablemente, nun llogremos la respuesta local qu’esperábamos, yá que namás respondieron un puñáu d’escueles. Esto foi descorazonador pa nós, pero ye un aspectu que pensamos meyorar l’añu que vien, coles mires de conectar meyor ya implicar a les escueles locales nel proyectu. Vamos siguir intentándolo y vamos siguir deprendiendo. Per otru llau, el grupu de profesores asturianos foi increíble, espublizando’l mensaxe ya implicando a los sos alumnos particulares. Tamos fonderamente agradecíos a toos y caún d’ellos.

« N’Asturies fiximos un ampliu llabor de divulgación en toles escueles de música y centros d’enseñanza primaria pero, llamentablemente, nun llogremos la respuesta local qu’esperábamos, yá que namás respondieron un puñáu d’escueles»

Llar Trad pon tamién el güeyu na mocedá, con tres beques pa menores de 35 años p’asistir a les masterclasses. ¿Ye necesario p’alimentar el futuru de la tradición?

Sí. Fixanos na mocedá ye esencial p’alimentar el futuru de la tradición. Les beques pa menores de 35 años tán diseñaes pa implicar ya inspirar a la xeneración viniente, dando-y oportunidaes pa deprender de maestros de la música y desenvolver les sos habilidades, garantizando la sostenibilidá d’estes práctiques culturales. N’Asturies, hai una baxada nel deprendizaxe de la música tradicional per parte de la mocedá. Esperamos dar exemplu, espertar l’interés y fomentar l’allegría. El desenvolvimientu de la mocedá ye la parte más difícil pero más importante de la nuesa misión.

Ufiertemos trés beques completes, con agospiu incluyíu, pa estudiantes menores de 35 años en collaboración con Músicasturiana. Naguamos por siguir faciéndolo mientres munchos años. Tamién ufiertemos seis places nel nuesu programa infantil.

Tres las masterclass, va haber tiempu pa les slow sessions, una iniciación a les sesiones folk. ¿En qué van consistir?

Les Slow sessions van ufiertar una introducción a les sesiones de música folk, con un ambiente relaxáu y de sofitu nel que los participantes van poder tocar música xuntos, compartir les sos conocencies y practicar lo que deprendieron. Estes sesiones tán diseñaes pa ser inclusives, animando a músicos de tolos niveles a participar y esfrutar del espíritu comuñal de la música folk.

Dirixíes por instructores espertos, llocales ya internacionales, estes sesiones son perfectes pa primerices o pa quien deseyen perfeccionar les sos habilidaes. Los participantes van deprender y van tocar cantares a un ritmu relaxáu, fomentando un ambiente de sofitu y collaboración. Vamos apurrir una llista de cantares de mano, pa que toos puedan familiarizase coles melodíes. Nestes sesiones nun se trata namás de facer música; trátase d’establecer conexones, compartir conocencies y esfrutar del espíritu comuñal de la música ensin la presión d’una clase formal. Va d’escuchar, deprender y participar al to propiu ritmu. 

«Les slow sessions tán diseñaes pa ser inclusives, animando a músicos de tolos niveles a participar y esfrutar del espíritu comuñal de la música folk»

Xunto col programa principal van a facese visites a llugares del conceyu. ¿Ye esta una actividá pa crear sinerxes ente la creación musical y l’espaciu nel que se desenvuelve l’eventu?

Esti añu nun tuviemos tantu tiempu como esperábemos tener pa desenvolver la contorna llocal. Pa la próxima edición tenemos grandes planes, sobre manera pa los acompañantes que nun son músicos. Sicasí, el pueblu tien un tresfondu espectacular, enclaváu al pie de les montañes. Naguamos, si’l tiempu dexa, por que los profesores puedan utilizar los espacios al aire llibre y que los nuesos alumnos s’inspiren na contorna.

Tamién la reciella va tener el so espaciu nel Llar Trad Fest. ¿Cómo va ser el programa col que queréis semar futuru nel folk? 

El programa de la reciella nel Llar Trad Fest incluye sesiones interactives qu’introducen a los participantes nos fundamentos de la música al traviés del cantu, el baille y la interpretación musical. L’oxetivu ye causar curiosidá y entretenimientu alimentando una pasión pa tola vida pola música y la cultura nun espaciu divertíu y solidariu.

Dirixíu por Mónica Acevedo, Janire Mañes, David Varela, y Xosé Antón “Ambás”, el programa fai un mecigayu d’actividaes inmersives na cultura y música asturiana, mesmo dientro que fuera. 

«Naguamos por que, con un bon sofitu, podamos convertilu nun eventu añal. Tamos encantaos cola respuesta y yá sabemos que l’añu que vien va haber más demanda»

Esta va ser la primera edición pero, ¿ñaz col oxetivu d’afitase nel panorama folk asturianu, estatal ya internacional?

Sí. Naguamos por que, con un bon sofitu, podamos convertilu nun eventu añal. Tamos encantaos cola respuesta y yá sabemos que l’añu que vien va haber más demanda. Convidáronnos a una conferencia y esposición que se va celebrar en xineru del añu que vien n’Irlanda, titulada «Your Roots are Showing», como ponentes convidaos pa presentar Llar. Tamién tamos estableciendo relaciones con instituciones internacionales pa proyectos europeos interculturales. 

Al ufiertar un actu pequeñu y íntimu centráu nel deprendizaxe, estremamónos d’otros festivales. Convidar a la collaboración supunxo un inmensu sofitu per parte de los educadores asturianos y de los participantes internacionales. Trátase d’un eventu al que personalmente viaxaría p’asistir y del qu’espero esfrutar mientres munchos años.

Cuando pase’l Llar Trad Fest, ¿cuál va ser la fueya de ruta de Llar?

Depués de Llar Trad Fest, la nuesa fueya de ruta incluye seguir ampliando los programes educativos, afalar les collaboraciones internacionales y desenvolver iniciatives de turismu caltenible. Un proyectu clave ye “Llar Allumar”, una iniciativa multidisciplinar y que revitaliza’l patrimoniu cultural y llingüísticu asturianu al traviés de la expresión artística y el compromisu dixital. Esti proyectu incluye un concursu de poesía y una residencia musical en Llanes, onde músicos de renome y talentos emerxentes van camudar la poesía en cantares.

Tamién ta previsto entamar conciertos más íntimos o acústicos n’escenarios ablucantes, como’l conciertu de Martin Hayes nun monesteriu en Celoriu mientres l’añu pasáu. Amás, queremos collaborar colos conceyos y festivales llocales, como l’eventu Llar Llanes de la Selmana Santa pasada. Con estos esfuerzos, queremos caltener l’impulsu y crear un impactu cultural que dure. 

Mercar discos de música folk