La nueva edición de los Alcuentros de Músiques Asturianes de Xixón llega a la so decimocuarta convocatoria consolidándose como una de les cites más importantes del panorama musical asturianu en Xixón. El ciclu, que se celebra nel espaciu del Patiu del Centru de Cultura Antiguu Institutu, convierte esti llugar nun puntu de xuntanza ente tradición, esperimentación y nueves voces de la escena actual. El programa apuesta por un formatu cercanu, con conciertos gratuitos, siempre a les 19:30 hores.
El ciclu abre’l 21 de mayu cola presentación del Anuariu de la Música Asturiana 2025, un proyectu de referencia pa documentar la vitalidá del panorama musical del país añalmente. Nesta sesión participan Xicu Ariza y Xune Elipe con una audición comentada del discu que lu acompaña.
El 28 de mayu ye’l turnu de Buir, un proyectu que xune a tres figures esenciales de la música tradicional asturiana: Ambás, Vero Rubio y Pepín de Muñalén. Esti grupu representa la recuperación y reinterpretación del repertoriu tradicional, combinando voces, flauta y sonoridaes que conecten col patrimoniu musical d’Asturies, pero dende una visión actualizada y creativa. El 2 de xunu actúen Mapi Quintana y Marcos Baggiani, nuna propuesta que mezcla poesía, sensibilidá vocal y percusión contemporánea.
El 4 de xunu suben al escenariu Ún de Grao y Rodrigo Martínez. La so propuesta basase nel diálogu ente instrumentos tradicionales y arreglos contemporáneos, con un fondu que bebe de la música de raigañu asturianu pero que busca nueves formes d’espresión. El 9 de xunu ye’l momentu de Alicia Villanueva xunto a Carlos Velasco, que van llevar a escena l’asturianada, siendo dambos campeones del Premiu d’asturianada Obdulia Álvarez «La Busdonga».
El ciclu despídese’l 12 de xunu cola propuesta A BAILLAR: Tarde en danza al mou Xixón, una xornada multidisciplinar que combina música y danza tradicional. Incluye un taller de baille a les 19:00 hores de Nel Villanueva acompañáu por Muyeres por Grau, siguíu del conciertu de Leirana (proyectu nuevu de Nel Villanueva) a les 20:00, y l’actuación final de María Trubia xunto a Pau Santirso a les 21:15.
Suscríbite a les nuestres novedaes
