Entama’l fin de selmana y fáilo con seis cites nes qu’hai charres, presentaciones, proyecciones, conciertos y fiestes en tres conceyos del país. El vienres 24 Héctor Braga presenta a les 19 el so ensayu Nel cantu la memoria. Ensayu sobre l’asturianada tradicional na Casa Bárcena de Carreña (Cabrales) y esa mesma hora estrénase na Casa’l Chinu de Cimavilla el cantar ‘Nun ye delitu‘ en sofitu a les 6 de La Suiza.
El sábadu 25 Arangas (Cabrales) vive’l so XVI Alcuentru de Música Tradicional, nel que dende les once la mañana va haber una montonera d’actividaes ente les que s’alcuentren les actuaciones de Grupo Principado, Grupo Perendengue, Bandina’l Kasañu, Marta Elola, Ricardo Balmori, Manuel Arenas y Joni y Diego. Per otru llau, n’Uviéu Nuramay presenten el so primer discu, a les 13h n’El Manglar; y en Xixón Diañu Blues vuelven a los escenarios con un conciertu a les 20.30h na Tizón Sound de Xixón.
L’axenda zárrala la proyección de Generación Xixón Sound, el domingu 19h nel Paraninfu de La Llaboral (Xixón) dientro del ciclu Tsudocu qu’entama’l Tsunami Xixón. Nesta película apaecen les y los protagonistes del Xixón Sound y personalidaes venceyaes a la cultura asturiana y el compromisu col asturianu como Alicia Álvarez, Nacho Vegas, Ramón Lluis Bande, Ruma Barbero y David Guardado.
Tola programación d’equí a los próximos meses pue vese na Axenda de Musicasturiana.com.
Suscríbite a les nuestres novedaes
