El rock n’asturianu ta de norabona porque dende güei suma una referencia discográfica nueva qu’afonda nun estilu poco esploráu dientro d’esta escena musical. Diañu Blues publiquen ¡Puxa’l Ximielgue!, un EP de cinco temes grabaos nos Estudios ACME qu’asoleya en formatu CD y en plataformes dixitales. Xunto a la formación xixonesa collabora’l saxofonista Javier Silva, qu’arriquez la sonoridá d’estos cantares blues-rock.
«Facemos el nuestru homenax al titán del ximielgue, Albert King, con un par de temes («Viaxeru» y «Nun me mientas») que «diañuzamos» pa la ocasión. Tamién incluyimos un par de temes yá conocíos como son el «Pucuñín» y «El baiḷḷe», nun pudimos evitar grabalos de nuevo depués de comprobar cómo se veíen potenciaos col saxu… Pa zarrar facemos otru cantar propiu, «Midnight Blues», tamién habitual nos nuesos conciertos, nesti casu n’inglés y daqué más sele que’l restu temes», comentó’l grupu nes sos redes sociales p’anunciar la publicación del trabayu,
Diañu Blues nació en Xixón en 2017 y tienen la particularidá de ser la primer -y única- formación n’interpretar blues cantando dafechu n’asturianu. Depués d’un llustru pisando escenarios, publicaron en 2021 nes plataformes dixitales el so primer material grabáu; cuatro cantares agrupaos en dos EP, Collacios y El Bail.le, que taben formaos por canciones propies y dalguna adaptación al asturianu de clásicos del blues. Daquella, el guitarrista y cantante del grupu, Pablo Nogueiro, declaraba al Anuariu de la Música Asturiana que taba grabáu «nel llocal de forma chabolista pura y dura, siguiendo’l rollu punkie del Do It Yourself». «Queremos facer un discu como dios manda yá y namás que tengamos la oportunidá p’allá que vamos». dicía Nogueiro y agora esa oportunidá yá ye una realidá con ¡Puxa’l Ximielgue!, una referencia única nel rock n’asturianu.
Suscríbite a les nuestres novedaes
