Calea llancen “Ya si sos pintalarrama” en toles plataformes dixitales
Yá ta disponible en toles plataformes dixitales “Ya si sos pintalarrama (Jota Candanín)”, el primer llanzamientu de Calea. Esta nueva banda formada por Silvia Quesada -cantante de bandes como Tejedor, Blima, Los Gatos del Fornu, amás de nel so proyectu en solitario-, Leticia Baselgas -veterana panderetera y cantante, anguaño n’activo con L-R- y Rubén Bada -pernomáu multiinstrumentista que nesti momentu toca tamién con L-.R, ¿Aü? y Alfredo González, ente otros proyectos-, presenta’l cantar como «una jota recoyida nel pueblu de Candanín del conceyu Valdés, arreglada al nuesu xeitu».
«Ye dalgo que tenía muncha gana de facer dende va bastante tiempu y agora que tenemos L-R asentáu y que Silvia tenía ganes de volver a la música tradicional, punxímonos con ello», desplica Rubén Bada sobre los oríxenes de la formación. El multiinstrumentista esclaria que «la idea ye facer un grupu vocal onde cantemos toos y qu’anque usemos instrumentos novedosos que nun tamos avezaos a ver na música asturiana, se vuelva a les armoníes modales; ye dicir, a recuperar la voz vieya d’esta tierra».
Nesti sen, el multiinstrumentista reflexona: «Depués de toos estos años esperimentando y afondando na conocencia de la música del país, y de los sos mecanismos y característiques, agora podemos trabayar con ella d’una manera muncho más íntima y afitada nel so espíritu» . «Nel momentu qu’empieces a ver eso ye cuando se pue ver que tenemos una música con sieglos d’historia, mui mui antigua. Sobre too nos repertorios cantaos y de determinaos instrumentos», sentencia Bada pa insistir que Calea quier trabayar dende’l «respetu a l’antigüedá d’estes pieces». “Ya si sos pintalarrama” ye la primer muestra de munches otres que van aportar per parte d’esti tríu nuevu.
