Electrónica del país

La música electrónica y la tradicional asturiana lleven compartiendo caminos dende los años 90. Nueves propuestes faen qu’esti son vaya a más.

La «Danza de Gozón» amiéstase col «Diamonds» de Rhianna. La voz d’Anabel Santiago suena con autotunes sobre una base de pop-electrónicu. «Soi de Verdiciu» y «Ritmo de la noche» alcuéntrense y naz el «Ritmu de Verdiciu». Grabaciones esperimentales en cassette que traten sobre la muerte de la llingua asturiana. Son dalgunos exemplos recientes pa reflexar que la música electrónica con identidá asturiana ye una realidá. Llegó nos años 90, na década del 2000 surdieron proyectos con sonadía y nos últimos años cada vez hai más referencies d’esti xéneru.

En 1996 Balandrán publicaba El viaxe, un discu que daba un pasu más nel folk renovador d’esta banda avilesina al incluyir dos cantares con influyencies de la electrónica: «Gallegada de Tinéu» y un remix d’«El Campanu». Abrieron un camín que dos años más tarde tendría éxitu internacional col discu Tierra de nadie d’Hevia, inventor tamién de la gaita midi. Temes como’l popular «Busindre reel» amosaben lo bien qu’empastaben los raigaños sonoros del país colos soníos electrónicos. El de Villaviciosa nun foi l’únicu gaiteru en facelo; nos trabayos de Bras Rodrigo Xermandía (2006) y A Pause in New York (2016) tamién rescampla la fusión del soníu de la gaita -acústica nel so casu- col producíu por programes informáticos.

Balandrán foron pioneros en 1996 n’amestar soníos electrónicos y folk

Más que bakalao

Nel nuevu sieglu poco quedaba yá de La Ruta del Bakalao -qu’equí n’Asturies tamién existió-, y menos prexuicios quedaben tamién pa cola música electrónica. Comprendióse qu’ésta yera muncho más que’l bakalao o’l techno y asina ye como les programaciones electróniques llegaben tamién al rock d’una banda como Dixebra: «La Danza» (Glaya un país, 2000), los remixes de dellos cantares nel Cróniques d’un pueblu (2003) y el discu Ensin novedá (2006), dan bona cuenta d’ello. 

Los puristes pensaríen que d’ehí nun pasaría la influyencia d’esti soníu; pero tamién llegaría hasta un xéneru al que paecía impensable qu’aportara: la tonada. La gran promesa de la canción asturiana, Anabel Santiago, estrenábase con Al son de la lluna (2002), un álbum qu’incluyía pieces al son del drum&bass como’l «Cantar del home solu» y que reinterpretaba con influyencies electróniques clásicos como «Coyí d’un artu una flor». Quince años depués, la cantante vuelve a caleyar per estos ritmos col espectáculu Electronic llances y col discu publicáu esti añu, Y_Andá

En 2002 sintióse’l primer drum&bass n’asturianu, coles voces a dúu d’Anabel Santiago y Xosé Antón Ambás

Nel 2006 naz Xera, el primer grupu dafechu de folk electrónicu, y un añu depués el productor Sergio Rodríguez llanzaba’l cedé Tutu Studiu 07 – Folk Electrónicu nel que participaron dellos de los nomes más destacaos de la música tradicional asturiana. Xunto a Xune Elipe, Rodríguez tamién impulsaba’l proyectu Soncai System qu’en Clashturies (2007) y Revolusón (2012) amestaba reggae, hip hop, rock, jazz y electrónica. Nesos años formaciones como La Bandina, N’Arba, Corquiéu, La Co.llá Propinde o Herbamora tamién fixeron pieces con calter electrónicu y remixes de dalgunos temes; el compilatoriu Asturllétric publicáu nel 2010 pola Xunta pola Defensa de la Llingua Asturiana recueye parte d’ellos, zarrando asina una década nel que xorrecía l’amiestu ente música tradicional asturiana y música electrónica.

Otra electrónica n’asturianu

Más allá d’esta fusión, nos últimos años ye cada vez más normal ver cómo iniciatives d’otros estilos dientro de la música electrónica escueyen la llingua asturiana pa dar nome a los sos trabayos. Atapeceres (2011) de Da Robotz -ún de los productores más reconocíos fuera del nuestru país-; o De Llingua Ad Mortem de Yunclas -publicáu esti añu en cassette pol sellu Grabaciones Autobombo-, son dos exemplos d’álbumes que pueden topase restolando per Soundcloud, Bandcamp y Mixcloud. Ye nestes plataformes dixitales nes que tamién hai pieces d’electrónica esperimental titulaes n’asturianu, como «Magüestu caníbal» de Koyaziu, «Esguilonazu» de Furo, o «Al abellugu de la música» de Grifo; productores venceyaos al Colectivu Sestatrónica de Xixón. LØV ye otru proyectu que davezu incorpora l’asturianu, como nel cantar «Artax» con lletra na nuestra llingua.

Fruela 757 reellabora esti himnu de Nuberu con soníos cumbieros

Nesti respasu a más de dos décades del triángulu formáu por música electrónica, tradicional y llingua asturiana ye inevitable falar d’otra de les propuestes más exitoses dientro y fuera d’Asturies; la de Rodrigo Cuevas. Nel 2016 llanza’l single «Ritmu de Verdiciu» y dende ehí foi trescendiendo les nuestres fronteres, llamando l’atención de tolos medios de comunicación y enllenando teatros, sales y places de tol Estáu col so espectáculu El mundo por montera, una mezcla de cabaret tresgresor y música popular asturiana xunto a soníos como la electrónica o’l reggaeton. 

Porque la música de raigañu y la electrónica suenen tan bien xuntes como lo demuestren los ritmos llatinos y electrónicos de los colombianos Bomba Estéreo, la folktrónica gallega de Baiuca o’l flamenco-trap de Rosalía. Equí tamién tenemos a Fruela 757. Col so drumambás y reggaetoná atrévese a reellaborar en clave electrónica pieces clásiques de l’asturianada como «Al pasar pel puertu»; a facer una cumbia-mix de «Tiempu de nosotros» de Nuberu, o a samplear a la rapera tamil cingalesa M.I.A sobre Anabel Santiago. Na sesión Kompangu (2017) o nel álbum Bugre (2018) pue sintise’l trabayu d’esti productor xixonés, ún de los DJs que xunto a otros como Dani Stylo o Garrucha Sexy, cada vez pinchen más en folixes y eventos que s’entamen pel país. Precisamente, esti saltu de sentir la electrónica asturiana nes grabaciones a disfrutar con ella enriba de los escenarios afita’l futuru d’estos soníos que llegaron va ventidós años, valtaron prexuicios, trunfaron internacionalmente en dalgunos casos, y anguaño siguen equí pa dir a más nos próximos años. 

Xicu Ariza. Artículu publicáu orixinalmente nel Anuariu de la Música Asturiana 2018.
(Nota del autor: Cuatro años depués, vimos como esti son espoxigó, con nueves propuestes como les de Llevólu’l Sumiciu, L.lercia, A Fesoria o Bimenes Underprao).

Dexa un comentariu

X