‘L’Aremu’ de Guieldu yá ta en toles plataformes dixitales
Yá asoleyó ‘L’Aremu’, l’esperáu primer cenciellu del grupu de música celta y new age Guieldu. Tres d’estrenalu ayeri n’esclusiva na canal de YouTube de musicasturiana.com, los dos cantares que formen esti llanzamientu, “L’Aremu” y “Irish Flead”, yá se puen sentir en toles plataformes dixitales.
“L’Aremu” ye un cantar que ta basáu na Danza de Cortes (tradicional asturiana del conceyu Quirós) y la Diana de la Sobarriba (tradicional de Llión), mentes que “Irish Flead” ye un set instrumental de tres reels irlandeses (The Kilfenora Reel, McDonagh’s Reel y The Musical Priest). Con esti llanzamientu, esta xoven banda que nació en 2019 y que ta formada por siete componentes que tienen ente los 19 y los 29 años, abre camín dientro de la música asturiana. Anguaño siguen trabayando nel local d’ensayu y preparando los directos que nun van dar hasta polo menos primavera o branu d’esti añu.
«La idea principal de Guieldu ye la de crear un grupu xoven, nuevu y dinámicu que traxera a la actualidá les sonoridaes de la música celta de los 80 y 90, la época del llamáu boom celta con artistas como Capercaillie, Dan ar Braz, Alan Stivell, Clannad o n’España Hevia, Luar na Lubre o Carlos Núñez», comenta Aneiros sobre l’oxetivu del so grupu, opinando amás qu’esta foi «una dómina mui marcada pola fusión d’estilos como’l new age qu’acercaben la música folk a tou tipu de públicos, incluso al qu’enxamás sintiera esti xéneru». Nesti sen, el fundador d’esta formación matiza que «pue dicise que Guieldu ye una banda “revival” que nun nagua namás por averar la música celta a los fans d’esta música, sinon tamién a xente interesao n’otros estilos como el folk-rock, new age, country, bluegrass, world music o pop». Esti primer cenciellu, ye un reflexu d’ello.
