L’Asociación Cultural Entaína Ribeseya organiza un añu más la Folixa la Sidre apostando pola música’l país. Dende esti vienres 2 hasta’l domingu 4, Ribeseya acueye actuaciones de música tradicional, conciertos, concursos y otres actividaes venceyaes a la cultura de raigañu y sidrera. Skontra, Bandina La L.lamuerga, Gaiteros del Carbón, Picarós, Corquiéu, La Tarrancha, DJ La Güeriata, la bandina de la Banda Gaites Ribeseya y los concursos de gaita y tambor van poner música’l país a la edición d’esti añu.
L’eventu arranca esti vienres 2 a les 21h col conciertu del grupu punk-folk Skontra. Amás d’ellos actúen les formaciones d’Asturies Avalle Van, La Guinda Episcopal y el colectivu ribeseyanu de DJs Costa Negra.
El sábadu 3 a les 13.30h toca la Bandina La L.lamuerga, una formación nueva de música tradicional que tien como cabezalera a Alba Menéndez (L.lariega). Pela tarde, Gaiteros del Carbón van facer un pasucáis a les 20h que va dar pasu a los conciertos, a les 21h, del tríu celta Picarós, la mítica banda folk Corquiéu, el grupu ska-fusión La Tarrancha y DJ La Güeriata cola so sesión d’electrónica & raigañu pa zarrar la nueche.
El domingu 4 la Banda Gaites Ribeseya actúa en formatu bandina la Banda Gaites Ribeseya a les 13.30h, dempués de la preba popular de la final del IX Concursu de Sidre Caseru de Ribeseya. Pela tarde tienen llugar los dos concursos de música tradicional: el VI Concursu de Gaiteros/es solistes «Gelu Cuervu» y el I Concursu de Pareyes de Gaita y Tambor de Ribeseya. Amás de música, nesti eventu imprescindible pa la cultura tradicional y popular d’Asturies, va haber más actividaes venceyaes cola identidá del país.
Suscríbite a les nuestres novedaes
