«”Fuerces pa baillar” ye una canción escontra lo rancio»
Tres llanzar el pasáu 14 d’abril el videoclip “Si te pregunten por mí“, Alfredo González asoleya un single nuevu del so próximu EP. “Fuerces pa baillar” ye un cantar que’l cantautor turonés define como «una crítica non panfletaria y baillable». La lletra, de Pablo Texón, ye una reacción «escontra la xente que namás mira pal pasáu y non pal futuru; y escontra quien usa la pallabra llibertá de manera equivocada»; y la música ye «más allegre y tien ciertu puntu baillable».
«Vínome la idega d’una frase un poco surrealista y depués pasé-yla a Pablo Texón, que ye maestru de maestros y fizo la lletra entera d’una manera increíble», comenta González esclariando que tenía «una música fecha entera y en base a eso que-y conté ocurrióse-y facer una canción escontra lo rancio». Sicasí, “Fuerces pa baillar” ye munches más coses. El músicu añade que la lletra «pue tener munches interpretaciones», incluso pue entendese que «fala de la oficialidá».
Con esti cantar nuevu que yá ta en toles plataformes dixitales Alfredo González llanza l’últimu adelantu d’Asuntu de Fe, el so próximu EP n’asturianu que va asoleyar en setiembre. «Son cuatro temes y depués otru que va dir fuera del EP y que sacaremos pa final d’añu nes plataformes dixitales, porque’l discu físicu nun va tar distribuyíu en tiendes; namás va poder mercase nos conciertos a partir del branu y na tienda de la mio discográfica».
Tercer trabayu n’asturianu dafechu
L’EP Asuntu de Fe va ser la tercer referencia qu’Alfredo González publica n’asturianu dafechu, dempués del aclamáu La Nada y Tu (2008 L’Aguañaz) y Dobleces (2011 Algamar Producciones), doble CD que González firmó xunto col escritor Pablo Texón. Pel mediu el músicu tamién trabayó na llingua autóctona componiendo p’artistes como Silvia Quesada, Muyeres, Alienda… y llanzó’l cantar “Pentotal” nel so anterior discu ‘Afluentes’.
