Vuelve una de les cites clásiques del entamu de la seronda, el Día’l Traxe’l País, llamáu agora Indumentaria, X Concursu y Muestra de Traxes Tradicionales Asturianos. El domingu 27 de setiembre dende les diez de la mañana va celebrase na Plaza los Dolores de Grau esti eventu que reivindica la cultura y identidá asturiana amosando la ropa tradicional del país «vistida con xeitu» y nel que va haber concursu, música de raigañu y otres actividaes.
«Convidamos a tola xente a que vista reproducciones de los traxes asturianos del país del s. XIX pa enllenar la villa de Grau y el so mercáu«, animen dende la organización del eventu pa celebrar un día «onde los nuestros paxellos tradicionales tengan el protagonismu que merecen, porque, anque siempre tan presentes en toles celebraciones asturianes, ye de xusticia que tenga una fiesta propia: un día enteru pa vistir, llucir y vivir el traxe’l país».
Asina ye como dende les diez de la mañana va haber música asturiana pela villa de Grau y la xente va poder vistir el so traxe llibremente. Amás, quien quiera, va poder participar dende les 13h n’Indumentaria, el concursu de traxes tradicionales. Hasta’l 21 de setiembre ta abierta la inscripción d’un certame que reparte 1.800 euros en premios en dos estayes: homes y muyeres. El primer premiu ta dotáu de 400 euros y unes lligues «que reconozan a la persona ganadora como Premiu Indumentaria 2026»; el segundu con 300 euros y el terceru con 200 euros. Les bases completes tán publicaes na web del eventu, onde tamién pue facese la inscripción.
«Ye importante precisar qu’Indumentaria nun ye un certame de guapura física, ye un concursu onde se va valorar que les persones se vistan con xeitu y fachenda según les fontes documentales que se conocen, reproduciendo la manera de vistir de los asturianos de mediaos del sieglu XIX. Cada persona proyecta la so manera de ser na ropa que viste: esa ye la riqueza», esclarien dende la organización d’esti concursu sofitáu pol Conceyu Grau y Caja Rural de Asturias.
D’esta manera, l’últimu domingu de setiembre hai una cita na villa moscona pa celebrar un eventu únicu que tien unos finxos mui concretos y necesarios: «que se valoren los traxes tradicionales asturianos, difundir el conocimientu de la nuestra ropa tradicional, promover la escelencia nel vistir y na confección de prendes tradicionales que son reproducciones de les documentaes como traxe’l país», amás de «ser un estímulu y un reconocimientu a les persones que fueron faciendo paxellos con aciertu y fidelidá a la tradición asturiana».
Suscríbite a les nuestres novedaes
