El circuitu de la Conseyería de Cultura, Política Llingüística y Deporte, Cultura en Rede, ta acabante de publicar el Catálogu de l’Actividá Musical Asturiana pal primer semestre de 2025 y d’abrir la convocatoria pal segundu semestre de 2026. Esti catálogu supón «la base pa la programación del Circuitu de Música de Cultura en Rede» y pueden incorporase espectáculos nuevos hasta’l 23 de febreru. Tola información ta na web d’esta iniciativa.
Según la publicación nel BOPA, «van poder formar parte d’esti catálogu producciones musicales d’artistes, grupos y empreses profesionales del sector musical allugaes n’Asturies» y «nel casu de los espectáculos que yá tean incorporaos, nun ye necesario volver a tramitar la so incorporación; queden formando parte del catálogu pal periodu señaláu». Tamién «puen retirase en cualquier momentu los espectáculos inscritos nel catálogu».
Con esta nueva convocatoria, yá van seis años consecutivos actualizándose esti Catálogu de l’Actividá Musical Asturiana venceyáu a Asturies Cultura en Rede, el circuitu qu’entama la Sociedá Pública de Xestión y Promoción Turística y Cultural del Principáu d’Asturies pa promover a lo llargo de los conceyos del país eventos musicales, de cultura tradicional, d’artes escéniques y de lliteratura.
Suscríbite a les nuestres novedaes
