El Conceyu Corvera ta acabante d’anunciar que, per primer vez, va celebrar nes sos fiestes el Día de l’Asturianía, una xornada dedicada a la cultura y la identidá asturiana. Va festexase’l sábadu 13 de setiembre y la so programación ufre delles actividaes ente les qu’hai deportes, xuegos tradicionales, representaciones teatrales y música en vivo.
La música n’asturianu va tar presente col conciertu d’ún de los grupos más míticos del país: Nuberu. El dúu formáu por Chus Pedro Suárez y Manolo Peñayos va actuar a les 20h nel Teatru El Llar de Les Vegues, con entrada llibre hasta completar aforu. Nel so recital van facer un repasu a cuasi cinco décades cantándo-y a les lluches populares y a la identidá d’Asturies.
«L’oxetivu d’esta iniciativa ye homenaxear a la idiosincrasia asturiana, reforzando la conexón de la ciudadanía col so patrimoniu cultural y averando les tradiciones a les nueves xeneraciones«, desplicaron dende l’Ayuntamientu de Corvera, que col Día de l’Asturianía da-y conteníu asturianu a les fiestes del octavu conceyu más pobláu d’Asturies, que van celebrase del 30 d’agostu al 13 de setiembre.
Suscríbite a les nuestres novedaes
