«Cuando entamé a tocar, metíes una guitarra eléctrica con una gaita y tirábente botellazos»

Santiago Gutiérrez ‘Ajo‘ (Avilés, 1963) ye una d’eses persones que probablemente nun son mui conocíes pal públicu común de la música asturiana, pero que ye una figura mui destacada d’esta escena. Foi componente de Trasgu, ún de los primeros grupos de folk asturianu; tocó n’Ixuxú; acompañó a la gaita a una montonera de grupos de baille… Tamién tocó varios instrumentos en delles formaciones y orquestes y exerce de técnicu de soníu n’eventos, la estaya de la industria musical que-y da de comer dende va décades.

El pasáu mes asoleyó en formatu USB y en plataformes musicales Puxa, el primer trabayu del so proyectu Ajo Band, que ta formáu por siete temes inspiraos na tradición pero compuestos por él. Coincidiendo con esti llanzamientu aprovechamos la ocasión pa falar un cachu con él na nuestra oficina. Charramos de la so trayectoria, de la evolución de la música tradicional, del proyectu d’Ajo Band… y déxanos una montonera d’anécdotes y curiosidaes, cuntaes cola humildá y la pasión de quien lleva 40 años nesto y tovía tien ilusión. «A mí sigue sorprendiéndome cualquier cosa, too», reconoz, y esta entrevista da bona cuenta de la so personalidá enllena de carisma.

Ajo Band, ye un proyectu nuevu, pero tú ya yes un veteranu de la escena musical asturiana. ¿Dende cuándo lleves venceyáu a la música tradicional asturiana y en qué formaciones participaste antes d’esti grupu?

Pues yo entamé a tocar música sudamericana nel 78 o perhí. A mí en vez de gustame los Beatles o Bob Marley, que taben saliendo d’aquella, dióme por tocar la quena. Yo yera de Quilapayún, de Violeta Parra, de la canción protesta, de Nuberu… Bueno, Nuberu yá foi un poco depués. A mí Nuberu cambióme la vida porque nun volví a conocer nada de tantísima calidá. Pero bueno, vamos pa enantes. Dábaseme bien la música y yera un bichu raru porque taba internu nel San Luis y teníamos una radio, y tolos mios amigos poníen Bob Marley y música de Los 40. Y yo d’aquella tenía una cinta de Quilapayún, de Violeta Parra, y dába-y al play y queríen matame.

Y depués xuntéme con Marti, con Herminia… foi la época de Trasgu, que tuvo mui guai. Facíemos los instrumentos nós; ficimos un arpa, un rabel… Teníemos a Juanjo, el pianista, que l’hermanu tenía un taller de… Bueno, de nunsequé, de coses pa Ensidesa. Y ehí facíemos de too. Caro, yera una época na que nun yera fácil comprar un instrumentu. Veíamos un arpa o veíamos una zanfona… Llueu consiguimos una zanfona en Santiago. Llamónos Juan Taboada, d’Uvieú, pa grabar un discu, y fuimos a grabar un discu a Madrid. Yo pasélo mui mal, porque d’aquella les gaites yeren un infiernu, nun yeren como anguaño. Y hostia, llegué pa Madrid con una gaita pal estudiu… Decíennos: “pero hombre, eso no lo grabéis. Pero eso no, hombre”. Too sonaba mui bien, tocábemos el piano, el vigulín, l’arpa, l’acústica…

Y llueu metíme al rock and roll. Tuvimos un grupu de punk, que nos llamábemos  Defecables. Y tamién grabamos dalgún discu, quedáremos finalistes de concursos de maquetes. Yera la época de la movida madrileña. Pero ellí nel ensayu, yo siguía tocando la gaita, porque tocaba con grupos de baille, tenía escolinos… Y ellí mecimos un poco les dos coses, y salió un grupu nomáu Ixuxú, col que tamién grabamos dalgún discu. Pero nada daba perres. Entós llamábenme pa dalguna orquesta, fui tocando con orquestes. Fui baxista, batería, teclista… fui de too. Y llueu, quitando la gaita, el resto de grupos, dexélos.

Y fai dos años agora qu’una amiga que ye d’equí de Xixón, Soraya, que ye de técnica de soníu, díxome de facer un videu. Tenía una canción grabada nel llocal; esa que siempre suena bien, que sal bien siempre nel directu o na maqueta. Y díxome que pa tener daqué n’internet, podíemos facer un videu, con dalgunes imáxenes del grupu… Y falé con Sergio Tutu -yo yera amigu del padre d’él- que me dixo: “joder, ta mui bien, tío, guapo y tal”. Y dixe-y: “pues tengo más pa siguir grabando”. Fui grabándolos y la verdá que s’involucró enforma porque grabó’l baxu, grabó dalguna guitarra… En fin, enzarrábemonos él y yo ellí y por eso salió lo de facer esti discu.

«En Trasgu facíemos los instrumentos nosotros; ficimos un arpa, un rabel…»

Volviendo l’entamu ¿Cuándo entamaste a tocar la gaita?

Pues yo soi del 63, y entamé de chaval a tocar la gaita por casualidá. N’Avilés había un paisanu que tocaba la gaita na cai. Que yo yá-y dixe al Ayuntamientu que teníemos que face-y una estatua… porque fui a tocar a Ortigueira y vi ellí la estatua del gaiteru, fui a tocar a Bretaña y tamién vi la estatua del gaiteru, y n’Avilés… nada, ni casu.

Como yo yá tocaba la flauta, cuando venía dalgún gaiteru a Avilés, que nun veníen muncho, decía-y que me dexara probar. Dalgún d’ellos dexóme y algamaba facela sonar. Entós yo diba pidiendo esos minutos de preba, y depués, con Trasgu, queríemos comprar una gaita. Yera un grupu nel que toos probábemos too. Lo mesmo Marce que yo; yo probaba’l vigulín, l’otru probaba con… bono, con too.

Y caro, les gaites yeren un desastre. ¡Pero un desastre! Yo la primer vegada que vi afinar gaites foi en Piedrasblancas. Vino un grupu de Bual que se llamaben Los Penácaros. Tocaben tres gaites, bombu y tambor, y yera así medio gallegu, y sonaben afinaos. Los gaiteros solíes velos tocar solos, y como decíemos nós “sólo faltaba ehí la culiebra”, porque yera una afinación rarísima. Tuvimos ellí sintiéndolos y díxonos el pasianu que si queríemos comprar una gaita que nos la vendía él. Tuvimos trabayando aquel branu, llimpiando, lijando y pintando un chalé en Lluanco. Diéronnos 15.000 pesetes y marchamos pa Bual. Marchar pa Bual nel 79 o perhí… Tuvimos que facer nueche en Navia, y en Bual namás taba asfaltao la zona de la ilesia. El resto yera caleya. Garramos la gaita, dormimos en casa d’él, d’Octavio, nuna tienda de campaña que lleváramos. Enseñónos canciones… Bueno, de maraviya.

Y depués, con esa gaita… caro, el día que se jode la payuela, quedes ensin gaita, porque… Mira, voi cuntate una anécdota mui significativa. Una vez fuimos a tocar a Vigo, al Festival Celta de Vigo, y d’aquella había un grupu en Madrid que se llamaben La Banda de Folk. Y el gaiteru yera de Lugo, y tenía la mesma gaita que yo, pero nun tenía una payuela gallega, nun yera una payeta. Yera una payuela como les que se facíen en Bual. Y nun sé de qué pueblu me dixo que yera. A mi llamóme l’atención, porque siendo’l mesmu tipu de gaita… yera un pocu distinta. Y depués, la primer gaita que tuve… Bueno, esa foi la primera que tuvimos. Pero depués, un primu míu gallegu tenía una gaita colgada en casa. Una gaita d’ébano, y regalómela porque nun la usaba. Entós caro, yo camudé’l punteru. Compre-y ún a Alberto Varillas, al de Xixón, que d’aquella fabricaba ensin afinador. Compré-y el punteru, pero la gaita nun afinaba, taba en Do sosteníu, y nosotros queríemosla en Do. Y fuimos pa ellí col afinador. Y llamóme la atención, porque nun conocíen l’afinador. Fabricaben… bono, como toos d’aquella. Nun había unes midíes, y la tonalidá, pues la que saliera. Y a partir d’ehí, rectificóme’l punteru y yá pudi tocar con él. Teníemos dos gaites, porque teníemos que dir a empayuelar a Bual, que yera imposible, porque yo nun tenía perres. Amás teníes que pasar la nuehe fuera. Entós usaba payueles de Luis Darnizo y de Varillas, que tábemos cerca. Ya nos arreglábemos.

«Marchar pa Bual nel 79… Tuvimos que facer nueche en Navia, y en Bual namás taba asfaltao la zona de la ilesia. El resto yera caleya. Garramos la gaita, dormimos en casa d’Octavio, nuna tienda de campaña que lleváramos»

Trasgu y Ixuxú. ¿En qué más formaciones tocaste lo que ye música tradicional?

Nun m’alcuerdo de más… Bono, grabé una gaita colos Stukas, toqué una temporada con Vicente Díaz…

¿Amás collaboraste con formaciones tradicionales y grupos de baille?

Con grupos de baille, sí. Con munchísimos. Toqué con La Mariñana de Xixón. Toqué pa los d’Avilés y Corvera… yo creo que toos. Dalguna vez con Escontra’l Raigañu, de la qu’entamaben. Ximielga la Saya tamién… con los de L’Artusu, de Mieres. Y non, nun toqué con munchos más. Igual se m’escaecieron…

Y agora, Ajo Band, que ye’l nuevu proyectu ¿Cuándo decidisti entrar nesti proyectu y cuáles fueron les razones?

Bono, foi casualidá. Foi que si pal el videu… pa meter una música cola flauta y tal… Y depués gracies a Tutu, y a Lolo (Manuel Faustino), que ye’l percusionista que toca conmigo. Decidí meter la gaita… Vi que gustaba, y yo siempre toi faciendo canciones y grabándoles nel llocal. Agora yá ye mui barato grabar n’estudiu, y el discu suena mui bien. Quedó mui bien grabáu, ta mui llimpiu… Yá te toi falando como técnicu de soníu. Xuntamos unes perres pa esto y pa lo otro y p’alantre. Y nun sé lo que saldrá, pero bono, yá salió bastante, nun pido muncho más.

El grupu complétase con Jose Manuel Andrade a les tecles.

Si, mira, yo tenía un grupu con guitarra acústica y percusión, y un día fuimos a tocar a Lalín. Y llamé a Jose, el curdioneru d’Ubiña, que tocaba con Xuacu Amieva. Yo conózolos dende qu’entamaron a tocar. Yera la época de Beleño, Trasgu, Ubiña… Conocémonos d’aquella dómina. Depués él nun pudo siguir por temes llaborales. Pero gustóme como sonaba, y por eso agora metimos teclaos, con Jose Manuel Andrade. Tamién mos acompañó nel discu Alberto Ablanedo, y Álvaro Canga como asistente de grabación.

Grabar un discu agora ye bien diferente a facelo nos años 80…

Hostia, sí. Ye qu’enantes yera una llocura. Mira, grabé nesti discu una canción con un asubío, que ye una ocarina piqueñina, que suena… desafinaba un montón. Díxi-y a Sergio de probar, y cuando acabé de tocalo dixe “nada, con esto nun se puede… nun afina, non…” Y díxome Sergio: “pera home, ven p’acá a sentilo”. Salí de la cabina y cuando lo sentí dixe “pero tío… ficisti un milagru”. Metió un pocu d’autotune y algamó afinala. Neses coses agora ye mui distinto.

Enantes… yá te digo, cuando fuimos a Madrid y sacamos la gaita… “Pero bueno, tais llocos, pero eso nun afina” Nun entendíen lo que yera… Teníemos un productor que, menos mal, yera mui buenu, que yera Luis Delgado. “Pero repítelo, repítelo”. Poniendo ellí la payuela p’arriba, p’abaxu… fuimos quien afinala un poco. Enantes yera a base de repetir. Garraben la cinta y podíen buscar l’error y cortalo un poco… Tabes cinco minutos afinando, o media hora, o lo que sea, calentando l’instrumentu. Agora vas al estudio y ye una cosa más fría… Y sobre too una cosa como la gaita, o cualesquier instrumentu que seya de vientu. Porque la temperatura del to aliendu tien que calecer la maera, tiene que garrar esi puntu de temperatura, d’humedá.

«Cuando fuimos a grabar a Madrid y sacamos la gaita… ‘Pero bueno, tais llocos, pero eso no afina…’ Nun entendíen lo que yera»

Amás de lo qu’hai na grabación en sí, tamién los cambios respecto a aquellos tiempos danse en cuestiones como los formatos o la propia edición del trabayu. Pasastis del vinilu al USB y de la discográfica a l’autoxestión. ¿Cómo ves tú la tresformación de lo qu’hai na industria musical nestos 40 años?

Madre mía, yo creo que la industria desapaez. Nun sé lo que pienses tú, pero creo que yá nun hai tresformación; yá desapaez del too. Pa mí el formatu dixital ye como si nun hubiera nada. Yo necesito daqué físico, por eso pensamos nel USB, porque… ¿Ónde ta? ¿En YouTube? Nun sé, yo necesito palpar dalgo. Y ta mui bien l’USB, porque ahora tolos coches lu tienen.

El nome y la portada son mui directos. “Puxa”, en lletres grandes. ¿Por qué quixisti facelo asina?

Bueno, porque mira, pesie a que n’Avilés nun se fala asturianu en xeneral… la palabra puxa nosotros usámosla muncho: “Marcó l’Avilés: ¡Puxa!» Puxa ye una palabra mui asturiana. Que tamién ta en Portugal y en Galicia, pero’l significáu que tien n’Asturies ye más fuerte.

Musicalmente, ¿Cómo presentaríes esti trabayu? ¿Qué ye lo que se pue sentir n’él?

Pues fici canciones de gaiteru, normales y corrientes. Nun ye música electrónica, qu’agora paez que nel folk ye too electrónica. Esto non, esto ye mui cenciellu. Tampoco quixi gaita y tambor. Hai canciones con bouzouki, otres con caxón… En cuanto al repertoriu son muñeires, la xota, un vals… D’inspiración tradicional pero compuestes. Nun diría que ‘faigo’ les canciones… van saliéndome, de variaciones que faigo cuando voi a tocar a un sitiu, y too eso voi xuntándolo, a base de cachinos.

«Pa mí el formatu dixital ye como si nun hubiera nada. Yo necesito daqué físico, por eso pensamos nel USB»

¿Puede decise qu’Ajo Band ye como una bandina?

Sí, sí, sí, como una bandina, sí. Más cenciello tovía qu’una bandina, porque na bandina metes bombo, metes tambor… y equí los arreglos de percusión son mui cenciellos, nun tienen esa importancia d’una bandina.

Yá falamos del procesu de grabación, nel que tuvo muncha importancia Sergio de Tutu Estudios.

Sí, a Sergio conózolu dende que nació. El padre yera pianista. Yera un músicu referente na música no namás d’Avilés, sinón de toa Asturies. Foi guitarrista en Méxicu, d’un grupu… nun sé si Los Tres Soles del Paraguay… o d’esi estilu. Y n’Avilés tocaba con orquestes. Yo conocílu tocando con un dúu llamáu Los Bardos. Yo toqué con Vicente Díaz, entré de gaiteru un añu qu’el fíu marchaba pa nun sé onde, y quedé de técnicu de soníu. Y alcuérdome d’un día que-y dixe: «Vicente, la meyor canción que tienes ye esa de ‘Hay un rincón en mi tierra’”. Paecíame d’una calidá superior, y díxome que-y la ficiera Sito, el pá de Sergio. Y caro, a Sergio conózolu dende guah.e. Resulta qu’hasta tocara conmigo, y yo nun m’alcordaba, de verdá.

«Nun diría que ‘faigo’ les canciones… van saliéndome, de variaciones que faigo cuando voi a tocar a un sitiu, y too eso voi xuntándolo, a base de cachinos»

Yes un veteranu, igual hai poques coses que te sorprendan yá. Dempués de 40 años, ¿sigue quedando ilusión a la hora d’intentar un proyectu como esti? ¿Qué espectatives tienes d’él?

Bueno, a mí sigue sorprendiéndome cualquier cosa, too. Non, yo nun medro, nun deprendo. Pásame con una mexicanada esa que diz “nada me han enseñado los años”. Pues pa mí, nun sé, sigue gustándome too; too.

Creo que l’estilu ye lo que menos importa, lo que más importa pa mí ye que la melodía diga daqué, y si tien lletra, meyor, pa qu’empaste cola melodía, pa que te toque más la fibra, ¿non? Y sígueme gustando too y sigo esperando too. Nun sé, axallá toquemos a esgaya… Pero a ver, equí n’Asturies, yo tengo que decir que ye mui duro; notros llaos a lo meyor, pero equí un buen branu son 10 bolos. Cuando yá repetisti equí, ellí, allá, pues yá sabes más o menos lo que va ser, nel meyor de los casos.

Pero a estes altures nun dexes de tocar… Ocúrrensete canciones, entós yá tas perdíu, yá ta.

Yá cuasi pa rematar, lleves más de cuatro décades venceyáu a la música tradicional. ¿Cómo ves la evolución y la salú d’esta escena? ¿Cómo ves tamién el relevu xeneracional?

La evolución bien bona. Cuando entamé a tocar, metíes una guitarra eléctrica con una gaita y tirábente botellazos. Güei ye una cosa normal, polo que la evolución, mui bien.

«Creo que l’estilu ye lo que menos importa, lo que más importa pa mí ye que la melodía diga daqué, y si tien lletra, meyor, pa qu’empaste cola melodía, pa que te toque más la fibra. Y sígueme gustando too y sigo esperando too»

Dicíes enantes qu’un buen branu equí son 10 conciertos. N’otros territorios son más, entós ¿Qué crees que se necesita pa que la música tradicional asturiana tenga la mesma salú que n’otros territorios?

Mira, voi decite una cosa que me da vergoña. N’Asturies nun sabemos l’himu d’Asturies. Yo voi a xuntame con cualquiera pa tocar la gaita… Y venga, vamos zarrar el bolo col ‘Asturies Patria Querida’. Y nun lo sabemos. Yo pregunto a tolos gaiteros, «¿Qué compás?» “Non, non, tú mira pa mí que ya t’aviso”. Y ye un desastre. A mí eso dame vergoña. Yo en Galicia, que soi mediu gallegu y toi muncho ellí, como toques mal l’himnu gallegu, nun vuelves a tocalo na vida. Ehí sí que te cae un botellazu. Porque los guah.es nel colexu deprenden l’himnu gallegu, y saben quién compuso la música. Y saben quién compuso la lletra.

Y equí hai profesores de música, conseyeros de Cultura, nunséqué. Y cuando nos xuntamos cuatro músicos… «¿Cómo tocamos Asturias Patria Querida? ¿Qué compás tien? ¿Cómo lu entamáis? Non, tú tira, yá te aviso yo». Ye una vergoña. Porque too educa, ¿sabes? Les amigues de mio fía piensen qu’una gaita asturiana ye una gaita escocesa, porque agora hai bandes; yá nun hai pareya de gaita y tambor. Hai bandes con tres roncones, caxes d’alta tensión… Que bueno, too eso nun ta mal, pero llueu nun sabemos tocar ‘Asturies Patria Querida’.

Creo que n’otros sitios pasó y equí menos… pienso que’l trucu ta en mecer la música “culta” cola música popular. Nun pue ser que nuna canción haiga tres vueltes d’un estribillu. Non, non. O hai cuatro o hai ocho. Y esto nun hai quien lo deprenda, porque tengo que parame a cuntar equí cuatro partes. Y en vez de ser cuatro, son tres. Eso nun ye lo que te pide’l cuerpu. Entós creo que lo bueno ye entemecer a compositores, arreglistes, xente “culto” técnicamente, con gaiteros, pandereteros… Porque nun cuadra, sinón. En cualesquier exerciciu d’harmonía, o te ponen cuatro o te ponen ocho, a nun ser que faigas una pequeña introducción o una coda, qu’entós ehí puedes yá lliberate un poco. Y yo creo que ye lo que falta. Tenía que tar un poco más xunto.

«N’Avilés nun hai nin concursu nin muestra de canción asturiana. A mi eso dame pena, ye como si dixeres que nun hai sidreríes»

¿Y el relevu xeneracional?

Bien, seguro que bien. Seguro que meyor que cuando entamé yo. Porque cuando entamé a tocar la gaita, n’Asturies yeren cuatro los que tocaben. Y nun veíes gaiteros, y meyoró munchísimo. Y agora hai pandereteros, pandereteres, gaiteros, gaiteres, tamboriteros. Bueno, agora parez que baxó daqué la canción asturiana, cosa que me da un poco pena. Yo creo que ye por culpa de los festivales celtes o por culpa de… parez que nun hai espaciu ehí. Y vas pa La Felguera y tol mundu canta, tol mundu sabe cantar. Eso tenía que ser n’Avilés tamién. N’Avilés, por exemplu, nun hai nin concursu nin muestra de canción asturiana. A mi eso dame pena, ye como si dixeres, bueno, pues nun hai sidreríes. Pues un poco asina. Agora tamos metíos nun formatu de conciertos, festivaleros… y nun hai sitiu a lo meyor pal cantautor, nun hai sitiu pa la canción asturiana. Bueno, van camudando los tiempos. Pero’l futuru yo véolu muncho meyor qu’antes. Mui bien.

Pa rematar pasando del folk al punk, decíemes que teníes una anécodta venceyada a La Polla Records…

Si. José Avilés yera alumnu míu de gaita y yo-y enseñara una muñeira y poco más. Pues él yera tremendu. Fizo la mili con unu que yera de La Polla Records y díxome que lu llamaren pa grabar y digo-y yo «nun me fastidies», porque daquella La Polla Records yera lo más, xunto con Kortatu y yá per enriba d’eso nun había más. Pues grabó él la gaita y foi pa mí una de les meyores grabaciones qu’hai de gaita na historia de la música.

Entrevista trescrita por Pablo Fernández.