El pasáu mes de xineru presentábase públicamente Cuévano, un grupu nuevu formáu por doce músicos con intereses y trayectories mui diverses que s’axunten davezu na Taberna El Cuévano de La Pola Siero. La formación ta acabante de llanzar el so primer cenciellu, ‘Tierra de madreñeros’, un cantar con influencies folk, blues y rock nel que collabora Anabel Santiago a la voz.
El tema nun pasa desapercibíu musicalmente; aporta una sonoridá novedosa na que pue sentise dende una uillean pipe hasta unes melodíes de guitarra blueseres, too ello con ritmu y trés grandes voces de l’asturianada que suenen n’otru rexistru: la d’Alicia Villanueva y Carlos Velasco -dambos componentes del grupu y, a la par, campeones nes categoríes femenina y masculina nel Premiu Obdulia Álvarez «La Busdonga»-, y la d’Anabel Santiago.
La lletra tamién ye diferente, y ye que ye la primer vegada qu’un grupu canta-y a un oficiu del país tan importante como ye’l de los madreñeros. Iván Testón, coordinador y lletrista de Cuévano desplícalo asina: «Foi mui ilusionante dende’l principiu por facer un homenaxe a esos artesanos de la madreña que dende fai casi mil años dan forma a esti máxicu calzáu. Amás a mí personalmente prestábame dedica-y un cantar a mio güelu, Gonzalo, que finó va un par de años y que yera un madreñeru escelente, y non namás a él; tamién a Luisito, Olegario, Albino, Horacio, Adriano… Esa xeneración de madreñeros casinos, cola que comparto apellíu, que yá nun tán ente nós y que bien merecen daqué reconocimientu».
Amás, Testón -que tamién foi ún de los impulsores de la Madreñada– cunta que’l cantar «va ser la banda sonora d’un proyectu que pronto saldrá a la lluz nel que buscamos da-y valir al trabayu d’estos artesanos y les sos técniques de construcción, que desgraciadamente tán cerca de finar».
Cuévano pue calificase como una «superbanda», non namás por ser doce componentes, sinón tamién pola destacada trayectoria de la formación: «Ye mui curioso que dende’l más veteranu que ye’l mayestru Xuacu Amieva al más xoven, que ye Julio Rodríguez, hai 50 años de diferencia. Amás d’ellos tamién formen el grupu Carlos Velasco y Alicia Villanueva como voces principales; José Alfredo Cordero, Maje Llames, Leti Cienfuegos y Alba Cuadra como coristes; Dani Álvarez como multiinstrumentista; Chino «El Indio» a la guitarra; Simón San José a la percusión y Alex Petu como baxista», comenta l’alma mater del proyectu, Iván Testón.
«Anabel Santiago ye un referente na música del país, a la que siempre almiré y pa mí yera un suañu que collaborara. Préstome muchísimu trabayar con ella; amás nun podemos pasar por alto que ye casina tamién«, desplica Testón al rodiu d’esta collaboración que, como tol cantar, grabóse en Kathedrale «un estudiu de nueva creación» nel que tamién ensayen pola importancia que-y dan «a lo analóxico y l’orgánico, con una idea musical mui ochentera»; daqué que conecta «cola mesma llinia pela que quier dir el grupu».
Cuévano yá tienen más temes grabaos que van formar parte del so primer discu. «El próximu cantar que vamos asoleyar ye ‘L’Altu Nalón’ y la idea ye sacalu a mediaos de marzu. Esta canción naz de la ‘Marcha de Brañes’ de Xuacu Amieva, y foi un arguyu pa mí poder pone-y lletra», diz Iván Testón. Amás dientro poco va poder vése-yos en directo: «la idea ye que nos presentemos na Taberna Cuévano nel mes d’abril. Esti chigre da nome al grupu y ye’l nexu d’unión ente la mayoría de nós. Que nun caiga nel olvidu l’importantísimu llabor que faen estos espacios«, sentencia’l cabezaleru d’esti proyectu que trai novedaes a la escena del país.
Suscríbite a les nuestres novedaes
