David Guardado asoleya ‘Nunca Vencida’ y fai una playlist que resume’l llibru en 12 cantares
Yá ta a la venta Nunca Vencida. Una Idea d’Asturies, una obra del filólogu y músicu David Guardado na que repasa la representación d’Asturies a lo llargo los sieglos. Un ensayu fundamental de 524 páxines pa conocer la nuestra historia y reflexonar sobre la identidá asturiana.
Coincidiendo cola publicación d’esti trabayu, Guardado repasa pa MUSICASTURIANA.COM los 12 capítulos del so llibru faciendo una llista de temes musicales que, per una razón o per otra, foron importantes na so vida personal y que, con una mirada (mui) suxetiva rellaciona colos discursos sobre Asturies de los que fala nel so ensayu, amosando asina cómo los caminos de les rellaciones que facemos ente la esperiencia individual y el pasáu, el presente y el futuru colectivu tienen dacuando ramales insospechaos. Los más de los temes son de los años 1988 y 1989, xusto cuando l’autor tenía 18 años; un momentu nel que taba afitando tanto los sos gustos musicales como la so idea d’Asturies.
1. Los oríxenes de la idea y el mitu: “In ‘n’ out of grace” – Mudhoney
El mitu sobre’l que se constrúi la idea d’Asturies y les sos diferentes versiones a lo llargo de la historia, ye’l de la independencia; el mitu d’un pueblu que llucha de forma perenne pola so llibertá y nunca ye vencíu. Como tolos mitos, desarróllase a lo llargo de la historia a traviés de narraciones que se tresmiten ente xeneraciones y tienen una función simbólica que s’acaba sintetizando nuna serie d’iconos y clixés históricos, evocadores y poéticos, y que siguen una lóxica que nun depende de la razón o de la realidá histórica.
La llibertá ye’l leit-motiv d’esti tema de Mudhoney, ún de los estandartes de lo que se diba llamar grunge. La banda de Seattle incorporó nesti cantar del so LP Superfuzz Bigmuff, de 1988, un sample de la película de cultu de 1966 The Wild Angels, qu’entama con esi míticu “we wanna be free” qu’en 1991 incluyiríen tamién Primal Scream nel tema “Loaded” de Scremadelica.
2. La construcción de la singularidá asturiana na edá media: “The magic number”- De la Soul
La singularidá asturiana constrúise discursivamente na Edá Media alredor de trés exes: el territoriu, la política y la relixón. Esa trinidá ye un númberu máxicu al que yá cantaben los trés miembros De la Soul nesti tema de 1989 qu’apaecía nel so álbum de debú col que llevaron un Hip Hop alternativu pero amable y optimista, que frayaba los estereotipos del xéneru, a les llistes d’ésitos. Na Edá Media, tres d’un procesu d’etnoxénesis, Asturies convertíase tamién nun iconu referencial, xerminal y tresversal pa interpretar los mitos de los oríxenes de los reinos peninsulares.
3. Asturies patria escura o nación nobilísima: de los Austries a los Borbones: “Bitter Sweet Symphony” – The Verve
Los discursos sobre Asturies na Edá Moderna bancien ente’l despreciu que surdía de la corte castellana y l’arguyu de los asturianos y asturianes que reividicaben el so papel pioneru nel marcu de la diversidá peninsular na monarquía compuesta de los Austries y nel contestu de centralización de los Borbones. Una dómina agriduce y repetitiva, pero rica en matices poco perceptibles, como esti tema de The Verve que foi’l so mayor ésitu en 1997 pero del que perdieron los derechos: el sample de los Rolling Stones que ye la base del tema fixo qu’estos reclamaren l’autoría del cantar y ganaren nos tribunales. En 2019, l’añu nel que na Xunta Xeneral s’algamó una mayoría a favor de la cooficialidá del asturianu, Jagger y Richards devolviéron-y a Richard Ashcroft, el líder de The Verve, los derechos sobre esti cantar icónicu.
«El mitu sobre’l que se constrúi la idea d’Asturies y les sos diferentes versiones a lo llargo de la historia, ye’l de la independencia; el mitu d’un pueblu que llucha de forma perenne pola so llibertá y nunca ye vencíu»
4. La idea d’Asturies y la construcción del Estáu unitariu nel XIX: “Where is my mind?” – Pixies
La construcción del Estáu lliberal nel sieglu XX faise dende la ideoloxía de la supresión de la diversidá: Asturies pierde’l nome y la institución histórica, la Xunta Xeneral, y col mitu de la maternidá y el del progresu xustifícase, como una necesidá, la perda de la so singularidá, lo que de dalguna manera ye perder la memoria; un procesu que se fai más intensu a traviés del borráu de la memoria qu’entaína na Restauración.
El clásicu de los Pixies qu’apaeció nel so LP Surfer Rosa de 1988 espresa un estáu de cambiu y de confusión que se pue rellacionar, con un poco d’imaxinación, especialmente si ye de nueche y col volume al alto la lleva , col que se vivió n’Asturies decimonónica.
5. L’alternativa discursiva autonomista y federalista nel XIX: “Rebel without a pause”- Public Enemy
Nel sieglu XIX articúlase una narrativa antagonista que se rebela contra’l discursu dominante que propugnaba un Estáu unitariu basáu nel modelu francés: la rebeldía pasa pela reclamación d’unos supuestos derechos perdíos, la llucha contra’l caciquismu y la recuperación del nome y les instituciones asturianes. Y en 1988, Public Enemy espublizaben It takes a nation of Million to hold us back, un LP cuasi perfechu que rápidamente franció toles llendes del rap y entró como un argayu en tolos territorios fronterizos de la música alternativa. Ente los sucos del vinilu sonaben les pallabres de Khalid Muhammad cuando dicía sobre la xente afroamericano: “robáronnos el nome, robáronnos la nuestra llingua…” y yera imposible nun rellacionar eses pallabres cola situación que teníes cerca, si yeres un mozu de 18 años qu’a final del sieglu XX t’interesaba la música independiente, la historia d’Asturies y la llingua asturiana. Yera una llamada a la rebelión ensin posa y a traviés del ritmu.
6. Depués del 98: la idea d’Asturies rexeneracionista: “Song to the siren”- This Mortal coil
La idea d’Asturies del rexeneracionismu del XX ye, como la del XIX, una propuesta de desaniciu, anque endolcada agora nel duce espeyismu de la trescendencia a traviés de la tresformación nun suxetu históricu etéreu y cosmopolita, disueltu felizmente por un bien superior presentáu como epítome del universalismu: la construcción del Estáu unitariu español.
This Mortal Coil, cola voz de la cantante de Cocteau Twins, Elizabeth Frazer, facíen en 1984 la versión de “Song to the Siren”, un poema de Larry Becket musicáu por Tim Buckley. Un cantar que pon los pelos de punta y nel que se narra l’atracción del irresistible desastre y de la renuncia al propiu ser pa dexase abrazar pola muerte.
«Nel sieglu XIX articúlase una narrativa antagonista que se rebela contra’l discursu dominante que propugnaba un Estáu unitariu basáu nel modelu francés: la rebeldía pasa pela reclamación d’unos supuestos derechos perdíos, la llucha contra’l caciquismu y la recuperación del nome y les instituciones asturianes»
7. L’autonomismu como ruptura o reforma del réxime (1900-1930): “The Queen is Dead”- The Smiths
Les trés primeres decades del sieglu XX, cola decadencia del réxime de la Restauración y la dictadura de Primo de Rivera son un progresivu y, aparentemente, inevitable pasu a la república, nel que’l cambiu del modelu d’Estáu o la so rexeneración, pasaben pol desarrollu d’un procesu autonómicu del qu’Asturies nun quedó al marxe, anque ye un tiempu mui poco estudiáu y reivindicáu. Ye conocida l’aversión de Morrissey a la monarquía y “The Queen is dead” ye ún de los meyores temes d’esta banda que foi tan importante pa un grupín de rapazos y rapaces de la mio xeneración. A final de la década de 1980, na dómina pre Cienfuegos, pudimos ver con devoción el video d’esti tema, que fixo Derek Jarman, nel Festival de Cine de Xixón, nos cines Hollywood.
8. La tresmutación de la idea d’Asturies: República o Revolución: “Revolution” – Spacemen 3
La revolución de 1934 trexo un cambiu radical na idea d’Asturies: foi’l puntu d’inflexón d’un procesu que venia guañando dende había décades col que s’afitó la idea de l’Asturies insumisa y irredenta, y que supunxo una auténtica resquiebra histórica. En 1989 Spacemen 3 publicaben el so LP Playing with fire, nel qu’incluyíen “Revolution”, ún de los sos temes más conocíos. El branu d’esi añu, unos meses primero de qu’el grupu s’estremare, vilos en directo tres d’ún d’aquellos viaxes n’ALSA a Inglaterra (25 hores de bus Xixón-Londres) nuna esperiencia cuasi mística. Esti tema tocáronlu dos veces y hai delles grabaciones, mui males, en Youtube d’esi día. Más de venti años depués, en 2011, cuando’l 15-M tomaba les casi acordábame d’esti discu pola sensación (probablemente mui naif) de tar viviendo un cambiu históricu importante.
9. De la Guerra civil al franquismu: “Accident waiting to happen” – Billy Bragg
Na guerra civil, la muerte volvió a ponese de moda, como canta Billy Bragg nesti tema sobre l’avance del fascismu, y anque la idea d’Asturies siguió venceyada a la rebeldía, foi estigmatizada en parte por un franquismu que tres de la so victoria entamó un llaváu de cara col que’l réxime pretendió desfacer parte de la idea denigratoria sobre Asturies que contribuyera a construyir na guerra.
Billy Bragg facia música pop, con gran reconocimientu nes llistes de música independiente y yera ún de los pocos autores con lletres abiertamente polítiques. Ún de los sos himnos ye esti, de 1991, nel que fala de la decepción con un antiguu compañeru, esi “accidente a puntu de pasar”, al que se refier con un xuegu de pallabres pal que modifica un clásicu del pop: si los Kinks falaben d’un “dedicated swallower of fashion” él failo d’un “dedicated swallower of fascism”, ye dicir, l’entregáu consumidor de moda ye equí un entregáu consumidor de fascismu.
«Na guerra civil, la muerte volvió a ponese de moda, como canta Billy Bragg nesti tema sobre l’avance del fascismu, y anque la idea d’Asturies siguió venceyada a la rebeldía, foi estigmatizada en parte por un franquismu»
10. La Transición: ente la democracia plurinacional y el nuevu consensu reaccionariu: “(When you wake) you’re still in a dream”- My Bloody valentine
Cuando Asturies espertó del suañu de la dictadura y les condiciones paecíen les propicies pa la elaboración d’un discursu nuevu, que concasare col tiempu políticu d’autonomía, plurinacionalidá y diversidá, el consensu de la Transición, na so versión asturiana, llevónos a l’actualización y adaptación del discursu franquista que se reinventó pa caltener la idea d’Asturies afitada pola dictadura sobre’l triángulu estáu unitariu-relixón-monarquía. Un conceptu que yera una evolución del discursu del rexeneracionismu nacionalista de los Menéndez Pidal, Joaquín Costa o’l llamáu Grupo de Oviedo.
En 1988 My Bloody Valentine asoleyaben el so LP Isn’t anything, quiciabes el mio discu favoritu si tuviere que falar namás d’ún. “(When you wake) you’re still in a dream” ye una d’ente toles xoyes qu’inclúi: Asturies espertó de la velea del franquismu gracies a discursos nuevos como’l que proponía Conceyu Bable, pero siguió tovía sumida nun suañu qu’aporta hasta güei.
11. La evolución de la idea d’Asturies nel periodu autonómicu: “Waiting room” – Fugazi
Col desarrollu y afitamientu de la idea dominante d’Asturies, basada na tradición unitarista, el paradigma asturianista que s’enunciara como alternativa na década de 1970, quedó nuna sala d’espera aguardando qu’aportara un tiempu propiciu, un tiempu meyor. En 1988 Fugazi, la banda que sal de la povisa de Minor Threat, asoleyaba “Waiting room”, un cantar de rabia xuvenil na que Ian Mackaye diz que ta cansáu de tar na sala d’espera, pide a tola xente deprimío que se llevante y anuncia que va lluchar polo que quier ser.
12. Un camín abiertu al futuru: “Welcome ghosts”- Explosions in the Sky
Esti ye l’únicu tema del sieglu XXI nesta llista. El futuru ta por escribir, y pasa por conocer, invocar y reconocer les nueses pantasmes, da-yos la bienllegada y convivir con elles, pero siempre mirando alantre y nun dexando que nos suman na señardá.
«Un cantar de rabia xuvenil na que Ian Mackaye diz que ta cansáu de tar na sala d’espera, pide a tola xente deprimío que se llevante y anuncia que va lluchar polo que quier ser»
